প্রধানমন্ত্রী তথা বিজেপিৰ জ্যেষ্ঠ নেতা নৰেন্দ্ৰ মোদীয়ে কৈছে যে কংগ্ৰেছ আৰু ইয়াৰ মিত্ৰ দলসমূহে নিজৰ ৰাজনৈতিক লাভালাভৰ বাবে সংবিধানক অস্ত্ৰ হিচাপে ব্যৱহাৰ কৰা চেষ্টা চলাইছে। বিহাৰৰ গয়াৰ গান্ধী ময়দানত আজি এখন নির্বাচনী সভাত ভাষণ দি শ্ৰী মোদীয়ে এইদৰে প্ৰকাশ কৰে। তেওঁ কয় যে বিৰোধী দলসমূহে জনসাধাৰণক বিপথে পৰিচালিত কৰাৰ বাবে বিজেপিয়ে সংবিধান সলনি কৰিব বুলি অপপ্ৰচাৰ চলাই আছে। কোনেও সংবিধান সলনি কৰিব নোৱাৰে বুলি শ্ৰী মোদীয়ে আশ্বাস দিয়ে। তেওঁ কয় যে বিজেপিয়ে ৰাষ্ট্ৰীয় সংবিধান দিৱস পালনৰ পৰম্পৰা আৰম্ভ কৰি বিজেপিয়ে সংবিধানৰ প্ৰকৃত ভাৱনা জনসাধাৰণৰ কাষলৈ লৈ যোৱাৰ চেষ্টা চলাইছে। প্রধানমন্ত্রীয়ে কয় যে জনসাধাৰণে লোকসভাৰ নিৰ্বাচনত বিৰোধী পক্ষৰ এই কুটিল প্ৰয়াসক পৰাভূত কৰিব। কংগ্ৰেছ আৰু ইয়াৰ মিত্ৰ দলসমূহে সনাতন ধর্মক অপমান কৰা বুলি শ্ৰী মোদীয়ে অভিযোগ তোলে। বিহাৰৰ বেয়া অৱস্থাৰ বাবে তদানীন্তন আৰ জে ডিৰ শাসন কালৰ সমালোচনা কৰি প্ৰধানমন্ত্ৰীয়ে কয় যে আৰ জে ডি জংঘলৰাজ আৰু দুৰ্নীতিৰ ইপিঠি-সিপিঠি স্বৰূপ। শ্ৰী মোদীয়ে আজি বিয়লি পূর্ণিয়াৰ ৰংগভূমি ময়দানত আন এখন জনসভাক সম্বোধন কৰিব।