বিশিষ্ট সাহিত্যিক, অসম সাহিত্য সভাৰ আজীৱন সদস্য ভৱানী প্রসাদ অধিকাৰীৰ আজি দেহাৱসান ঘটিছে। পাণ্ডু মহাবিদ্যালয়ৰ অৱসৰী অধ্যাপক তথা সমালোচক অধিকাৰীয়ে ভাষা আৰু ভাষা তত্বকে ধৰি গৱেষণাধৰ্মী আৰু সমালোচনাত্মক লেখাৰে অসমীয়া সাহিত্যক চহকী কৰি থৈ গৈছে। ছুটিগল্প, কবিতা, গীত আৰু নাট্য চৰ্চাৰেও বৰঙণি আগবঢ়োৱা অধিকাৰীয়ে কেইবাখনো গ্ৰন্থ প্রণয়ন আৰু সম্পাদনাও কৰি গৈছে। ১৯৪৩ চনত নলবাৰী জিলাৰ টিহুৰ মাখিবাহা গাঁৱত জন্মগ্রহণ কৰা অধিকাৰীয়ে স্কুলীয়া দিনৰেপৰা নিৰৱচ্ছিন্নভাৱে সাহিত্য চৰ্চা কৰি আহিছিল। ২০২১ চনত তেওঁলৈ অসম সত্ৰ মহাসভাৰ সাহিত্য বঁটা আগবঢ়োৱা হৈছিল। মুখ্যমন্ত্ৰী ড° হিমন্ত বিশ্ব শৰ্মাই অধিকাৰীৰ বিয়োগত গভীৰ শোক প্ৰকাশ কৰি তেওঁৰ বিয়োগ অসমৰ সমাজ জীৱনৰ বাবে অপূৰণীয় ক্ষতি বুলি মন্তব্য কৰে। শিক্ষামন্ত্রী ডাঃ ৰণোজ পেগুৱেও সাহিত্যিকগৰাকীৰ বিয়োগত গভীৰ শোক প্ৰকাশ কৰাৰ লগতে শোকসন্তপ্ত পৰিয়াললৈ সমবেদনা জ্ঞাপন কৰে।