বিশিষ্ট চিত্রশিল্পী দিলীপ তামুলীলৈ ২০২৪ বৰ্ষৰ প্ৰণৱ বৰুৱা শিল্পী বঁটা আগবঢ়োৱা হৈছে। চিত্ৰকলা আৰু ভাস্কৰ্যৰ ক্ষেত্ৰত জীৱনজোৰা সাধনাৰ স্বীকৃতি হিচাপে দিলীপ তামুলীলৈ এই বঁটা আগবঢ়োৱা হৈছে। ২০০২ চনৰ পৰা প্ৰয়াত চিত্রশিল্পী প্ৰণৱ বৰুৱাৰ স্মৃতিত প্ৰতি বছৰে উত্তৰ পূৰ্বাঞ্চলৰ একোগৰাকী শিল্পীলৈ এই বঁটা প্ৰদান কৰি অহা হৈছে। এই বঁটাত আছে – এটা স্মাৰক, এখন প্রশস্তি পত্ৰ আৰু নগদ ২৫ হাজাৰ টকা। উল্লেখযোগ্য যে ১৯৫৮ চনত মাজুলীত জন্মগ্ৰহণ কৰা শিল্পী দিলীপ তামুলীয়ে শান্তি নিকেতনৰ বিশ্বভাৰতী বিশ্ববিদ্যালয়ৰ পৰা গ্ৰাফিক্সৰ স্নাতকোত্তৰ ডিপ্ল’মা অৰ্জন কৰে। গুৱাহাটীৰ চৰকাৰী চাৰুকলা মহাবিদ্যালয়ত অৱসৰ গ্ৰহণ কৰা শিল্পীজনে ৰাজ্যৰ চিত্ৰকলাৰ ক্ষেত্ৰখনলৈ বহু বৰঙণি আগবঢ়াইছে।