জ্যেষ্ঠ বিজেপি নেতা তথা কেন্দ্রীয় গৃহ মন্ত্ৰী অমিত শ্বাহে আজি উত্তৰ প্ৰদেশৰ কাজগঞ্জ জিলাত নির্বাচনী প্ৰচাৰ চলায়। শ্ৰীশ্বাহে অযোধ্যাৰ প্ৰাণ প্রতিষ্ঠা অনুষ্ঠানত অংশ গ্রহণ নকৰাৰ বাবে বিৰোধী দলক সমালোচনা কৰি কয় যে, বিজেপিয়ে নির্বাচনী ইস্তাহাৰত উল্লেখ কৰা সকলোবোৰ প্ৰতিশ্ৰুতি পূৰণ কৰিছে। শ্ৰীশ্বাহে ৰাজ্যখনৰ মেইনপুৰী আৰু এটাৱাতো নিৰ্বাচনী সভাত অংশগ্ৰহণ কৰে। তেওঁ লগতে কানপুৰত দলৰ কৰ্মচাৰীসকলৰ সৈতে সাধাৰণ নিৰ্বাচন সন্দৰ্ভত এখন বৈঠকতো মিলিত হয়। আনহাতে, জ্যেষ্ঠ বিজেপি নেতা তথা উত্তৰ প্ৰদেশৰ মুখ্যমন্ত্ৰী যোগী আদিত্য নাথে বৰেলি জিলাৰ বাদায়ুন আৰু আউনলা অঞ্চলত প্ৰচাৰ অভিযানত ভাগ লয়। সমাজবাদী পাৰ্টীৰ মুৰববী অখিলেশ যাদৱে চম্ভল জিলাৰ দলৰ প্ৰাৰ্থীগৰাকীৰ হৈ নিৰ্বাচনী প্ৰচাৰ চলায়। তেওঁ বিজেপিক সমালোচনা কৰি কয় যে, উত্তৰ প্ৰদেশৰ জনসাধাৰণে নিৰ্বাচনৰ প্ৰথম দুটা পৰ্যায়ত বিজেপিক উচিত প্ৰত্যুত্তৰ দিছে আৰু ইয়াৰ বিপৰীতে কংগ্ৰেছ মিত্রজোঁটে ৰাজ্যখনত জনসাধাৰণৰ পৰা বহুল সমর্থন লাভ কৰিছে। শ্ৰীযাদৱে বৰেলিৰ আন এখন জনসভাতো অংশ লয়। বি এছ পিৰ আকাশ আনন্দে সীতাপুৰ জিলাত নির্বাচনী সভাত ভাগ লয় ।