ডাউনলোড
মোবাইল এপ

android apple
signal

January 15, 2025 8:32 PM | Bangladesh

printer

বাংলাদেশৰ উচ্চতম ন্যায়ালয়ে প্ৰাক্তন প্রধানমন্ত্রী বেগম খালেদা জিয়া আৰু তেওঁৰ পুত্ৰক দুৰ্নীতিৰ গোচৰৰ পৰা দোষমুক্ত কৰিছে

বাংলাদেশৰ উচ্চতম ন্যায়ালয়ে আজি এটা গুৰুত্বপূৰ্ণ ৰায়যোগে দেশখনৰ প্ৰাক্তন প্রধানমন্ত্রী বেগম খালেদা জিয়া আৰু তেওঁৰ পুত্ৰ তথা বাংলাদেশ নেচনেলিষ্ট পাৰ্টীৰ শীৰ্ষ নেতা তাৰিক ৰহমানক দুৰ্নীতিৰ গোচৰৰ পৰা দোষমুক্ত কৰিছে। বাংলাদেশৰ মুখ্য ন্যায়াধীশ চৈয়দ ৰাফাৎ আহমেদৰ নেতৃত্বৰ এখন ৫ জনীয়া খণ্ড বিচাৰপীঠে ২০০৮ চনত তদানীন্তন শ্বেখ হাচিনা চৰকাৰৰ দিনত উন্মোচিত জিয়া অনাথ আশ্রম ন্যাসৰ দুৰ্নীতিৰ গোচৰত বেগম খালেদা জিয়া, তেওঁৰ পুত্ৰ আৰু আন কেইবাজনক দিয়া ১০ বছৰৰ কাৰাদণ্ডৰ নিৰ্দেশ খাৰিজ কৰে। খণ্ড আদালতে দিয়া এই ৰায়টোত বেগম খালেদা জিয়াৰ বিৰুদ্ধে প্রতিশোধমূলকভাৱে এই গোচৰ তৰা হৈছিল বুলি মন্তব্য কৰে। আজিৰ এই ৰায়দানৰ ফলত বেগম খালেদা জিয়া আৰু তেওঁৰ পুত্ৰ তাৰিক ৰহমানে দেশখনৰ পৰৱৰ্তী সংসদীয় নিৰ্বাচনত ভাগ ল’ব পাৰিব। উল্লেখযোগ্য যে, বেগম খালেদা জিয়া প্রধানমন্ত্ৰিত্বৰ কালত ২০০১ চনৰ পৰা ২০০৬ চনৰ ভিতৰত দেশখনৰ প্ৰাক্তন ৰাষ্ট্ৰপতি তথা খালেদা জিয়াৰ স্বামী জিয়াউৰ ৰহমানৰ নামত খোলা জিয়া অনাথ আশ্রম ন্যাসলৈ বিদেশী দানৰূপে লাভ কৰা ২১ নিযুত বাংলাদেশী টাকা মূল্যৰ ধন আত্মসাৎ কৰা বুলি অভিযোগ উঠিছিল আৰু তেতিয়াৰ শেখ হাচিনা চৰকাৰে চলোৱা তদন্তত বেগম খালেদা জিয়া আৰু তেওঁৰ সহযোগীসকলক দোষী বুলি অভিযুক্ত কৰা হৈছিল। ঢাকাৰ নিম্ন আদালতে এই গোচৰত খালেদা জিয়া আৰু তাৰিক ৰহমানক দোষী সাব্যস্ত কৰি ৫ বছৰৰ কাৰাদণ্ড বিহিছিল আৰু পৰৱৰ্তী কালত ঢাকা উচ্চ ন্যায়ালয়ে এই কাৰাদণ্ডৰ ম্যাদ ১০ বছৰলৈ বৃদ্ধি কৰিছিল।

অধিক পঢ়ক

সকলো চাওক