প্রধানমন্ত্ৰী নৰেন্দ্ৰ মোদীয়ে সমাগত লোকসভা নিৰ্বাচনৰ বাবে আজি মধ্যপ্ৰদেশৰ জবলপুৰ সমষ্টিত এটা ৰোড শ্ব′ত অংশগ্ৰহণ কৰি বিজেপিৰ নিৰ্বাচনী প্ৰচাৰ আৰম্ভ কৰিব। এই ৰোড শ্ব’টো আজি সন্ধিয়া শ্বহীদ সিং ক্ৰচিঙৰ পৰা আৰম্ভ হৈ গোৰখপুৰৰ আদি শংকৰাচাৰ্য ক্ৰচিঙত অন্ত পৰিব। উল্লেখযোগ্য যে মধ্যপ্ৰদেশৰ মহাকোশল অঞ্চলৰ অন্তৰ্ভুক্ত বালাঘাট আৰু জবলপুৰ সমষ্টি দুটাত বহু জনজাতীয় ভোট আছে। ২০১৯ চনৰ লোকসভা নিৰ্বাচনত মধ্যপ্ৰদেশৰ ২৯ খন আসনৰ ভিতৰত কংগ্ৰেছে জয়লাভ কৰিবলৈ সক্ষম হোৱা চিন্দ্ৰৱাৰা সমষ্টিটোও এই অঞ্চলৰে অন্তৰ্ভুক্ত। প্রধানমন্ত্ৰীয়ে মঙলবাৰে বালাঘাটতো এখন জনসভাত ভাষণ দিব বুলি বিজেপিৰ দলীয় সূত্ৰই প্ৰকাশ কৰিছে। উল্লেখযোগ্য যে এই সমষ্টি কেইটাত অহা ১৯ এপ্ৰিলত ভোটগ্ৰহণ কৰা হ’ব।