কেন্দ্ৰীয় ড’নাৰ ৰাজ্যমন্ত্ৰী ড০ সুকান্ত মজুমদাৰে আজি গুৱাহাটীৰ ভেষজ শিক্ষা আৰু গৱেষণা প্ৰতিষ্ঠান, নাইপাৰত চেন্ট্ৰেল এনিমেল ফেচিলিটী আৰু ইনভিট্রো ড্রাগ টেষ্টিং ফেচিলিটী মুকলি কৰে। মন্ত্ৰীগৰাকীয়ে গুৱাহাটীৰ ভাৰতীয় প্ৰযুক্তি বিদ্যা প্রতিষ্ঠান, আই আই টিত কেন্দ্রীয় শিক্ষা প্রতিষ্ঠানসমূহৰ সৈতে এখন পর্যালোচনামূলক বৈঠকত মিলিত হয়। বিয়লি চাৰে তিনি বজাত মন্ত্ৰীগৰাকীয়ে গুৱাহাটী বিশ্ববিদ্যালয়ৰ ব্ৰহ্মপুত্ৰ অধ্যয়ন কেন্দ্ৰৰ এটা ভৱন মুকলি কৰে। বান, বহনক্ষম উন্নয়ন তথা সংৰক্ষণৰ দৰে প্ৰত্যাহ্বানসমূহৰ মুখামুখি হোৱাৰ লগতে ব্ৰহ্মপুত্ৰ অৱবাহিকাৰ সামগ্ৰিক ব্যৱস্থাপনাৰ উদ্দেশ্যে আঞ্চলিক সহযোগিতা আৰু নীতি প্রণয়নক লাভান্বিত কৰাৰ লক্ষ্য আগত ৰাখি এই কেন্দ্ৰটো স্থাপন কৰা হৈছে। এই কেন্দ্ৰৰ জৰিয়তে ব্ৰহ্মপুত্ৰ নদীৰ গৱেষণাত নতুন মাত্ৰা লাভ কৰিব পৰা যাব বুলি আশা কৰা হৈছে।