নতুন বিধানসভা সমষ্টিৰ ভিত্তিত নতুন ৰেচন কাৰ্ড বিতৰণৰ দ্বিতীয় পৰ্যায়ৰ কাৰ্যসূচী আজি আনুষ্ঠানিকভাৱে আৰম্ভ হৈছে। এই উপলক্ষে মুখ্যমন্ত্ৰী ড০ হিমন্ত বিশ্ব শৰ্মাই লখিমপুৰ বিধান সভা সমষ্টিৰ চকুলিভৰীয়াত ৰেচন কাৰ্ড বিতৰণৰ কাৰ্যসূচীত মুখ্য অতিথি হিচাপে অংশগ্ৰহণ কৰে। আনহাতে ধেমাজিত শিক্ষামন্ত্ৰী ডাঃ ৰণোজ পেগু, ডিব্ৰুগড়ত মন্ত্ৰী প্ৰশান্ত ফুকন, টিহুত চন্দ্ৰমোহন পাটোৱাৰী, কাছাৰৰ কাটিগড়াত কেন্দ্ৰীয় ৰাজ্য মন্ত্ৰী পবিত্ৰ মাৰ্ঘেৰিটাই ৰেচন কাৰ্ড বিতৰণৰ কাৰ্যসূচীত অংশগ্ৰহণ কৰে। বজালী জিলাৰ সৰুপেটা আৰু তামুলপুৰতো মুখ্যমন্ত্ৰী ড০ শৰ্মাই ভার্চুৱেলী ৰেচন কাৰ্ড বিতৰণৰ কাৰ্যসূচী আৰম্ভ কৰে। বিজনীতো বিধায়ক অজয় কুমাৰ ৰায়ৰ উপস্থিতিত নতুন ৰেচন কাৰ্ড বিতৰণৰ শুভাৰম্ভ কৰা হয়। উল্লেখযোগ্য যে নতুন ৰেচন কাৰ্ড বিতৰণ কাৰ্যসূচীৰ দ্বিতীয় পৰ্যায়ত ৰাজ্যৰ ১৬ জিলাৰ মুঠ ৫ লাখ ১৯ হাজাৰ ৩৬৫ গৰাকী হিতাধিকাৰীক ৰেচন কাৰ্ড প্ৰদান কৰা হ’ব। এই নতুন হিতাধিকাৰীসকলে প্রধানমন্ত্ৰী গৰীব কল্যাণ অন্ন যোজনাৰ অধীনত অহা বছৰৰ জানুৱাৰীৰ পৰাই বিনামুলীয়া চাউল লাভ কৰিব।