নগাঁৱৰ আগশাৰীৰ শিক্ষানুষ্ঠান নগাঁও চৰকাৰী উচ্চতৰ মাধ্যমিক বালক বিদ্যালয়ৰ ১৫৯ সংখ্যক প্ৰতিষ্ঠা দিৱস আজি দিনজোৰা কাৰ্যসূচীৰে উদযাপন কৰা হয়। এই উপলক্ষে বিদ্যালয়ৰ চৌহদত স্থানীয় বিধায়ক ৰূপক শৰ্মাই প্ৰতিষ্ঠা দিৱসৰ পতাকা উত্তোলন কৰে। ইয়াৰ পাছতে আয়োজিত শ্রদ্ধাঞ্জলি অনুষ্ঠানত বিদ্যালয়খনৰ প্ৰতিষ্ঠা কালৰ পৰা জড়িত শিক্ষাগুৰু আৰু ব্যক্তিসকলক শ্ৰদ্ধাৰে সোঁৱৰণ কৰা হয়। প্ৰতিষ্ঠা দিৱসৰ সৈতে সংগতি ৰাখি শোভাযাত্ৰা উলিওৱাৰ লগতে বিদ্যালয়ৰ প্ৰাংগণত নতুনকৈ নিৰ্মাণ কৰা দুমহলীয়া অতিৰিক্ত শ্ৰেণীকোঠাৰ উন্মোচন কৰা হয়। স্থানীয় বিধায়ক শ্ৰী শৰ্মাই শ্ৰেণীকোঠাৰ দ্বাৰ উন্মোচন কৰে। আজিৰ এই অনুষ্ঠানত বিদ্যালয়খনৰ বৰ্তমানৰ অধ্যক্ষ বসন্ত গোস্বামী, বিদ্যালয় পৰিচালনা সমিতিৰ সভাপতিৰ লগতে প্ৰাক্তন অধ্যক্ষ, প্রাক্তন শিক্ষাগুৰু আৰু প্ৰাক্তন শিক্ষার্থী উপস্থিত থাকে।