দৰং জিলাৰ খাৰুপেটীয়াৰ উপকণ্ঠৰ বদলিবৰালি গাঁৱত আজি এটা বাঘে এজন লোকক আক্রমণ কৰে। স্থানীয় গাঁওৰক্ষী বাহিনীৰ সদস্য জনোৱা অনুসৰি বাঘৰ আক্ৰমণত আহত হোৱা ওমৰ আলী নামৰ লোকজনক মঙলদৈ অসামৰিক চিকিৎসালয়ত ভৰ্তি কৰোৱা হৈছে। খেতিপথাৰত কাম কৰি থকাৰ সময়ত অতর্কিতে বাঘটোৱে লোকজনক আক্ৰমণ কৰে। ইতিমধ্যে বন বিভাগ আৰু আৰক্ষীৰ লোকে ঘটনাস্থলীত উপস্থিত হৈ পৰিস্থিতিৰ ওপৰত নজৰ ৰাখিছে। উল্লেখযোগ্য যে কিছুদিন পূৰ্বে ধুলা থানাৰ অন্তৰ্গত গৰাপুৰি গাঁৱত বাঘৰ আক্ৰমণত এগৰাকী মহিলা আহত হৈছিল।