দিল্লী অগ্নিনির্বাপক বাহিনীয়ে দিল্লীৰ বোমা বিস্ফোৰণৰ ভাবুকিক দুষ্ট চক্ৰৰ উৰা বাতৰি হিচাপে অভিহিত কৰিছে। উল্লেখযোগ্য যে ইন্দিৰা গান্ধী আন্তঃৰাষ্ট্ৰীয় বিমান বন্দৰ, মংগলপুৰী অঞ্চলৰ সঞ্জয় গান্ধী হাস্পতাল আৰু বুৰাৰীৰ চৰকাৰী চিকিৎসালয়লৈ কালি কোনো দুষ্টচক্রই ইমেইল কৰি অনুষ্ঠান কেইখন বোমাৰে উৰুৱাই দিয়াৰ ভাবুকি দিছিল। দিল্লী অগ্নিনির্বাপক বাহিনীৰ বিষয়াৰ মতে, চিকিৎসালয় আৰু দিল্লী বিমানবন্দৰত বোমাৰ ভাবুকিৰ সন্দৰ্ভত ইমেইল লাভ কৰাৰ লগে লগে আৰক্ষী বোমা বিশেষজ্ঞ আৰু ডগ স্কোৱাৰ্ডৰ দল ততাতৈয়াকৈ সেই স্থানলৈ প্ৰেৰণ কৰা হৈছিল। বিষয়াগৰাকীয়ে জনোৱা মতে স্থানসমূহত তালাচী চলোৱাৰ পিছত তাত সন্দেহজনক একো পোৱা নগ’ল।