তেলেংগানাৰ ৱাৰংগল জিলাৰ মামুনুৰু ঘাইপথত লোহাৰ সামগ্ৰী কঢ়িয়াই অহা এখন ট্রাকে নিয়ন্ত্রণ হেৰুৱাই দুখন অট’ৰিক্সাক খুন্দাৰ মৰাৰ ফলত ৫ গৰাকী লোকৰ মৃত্যু হোৱাৰ লগতে আন ৬ জন লোক আহত হয়। ঘটনাৰ প্ৰাৰম্ভিক প্ৰতিবেদন অনুসৰি ৱাৰংগল জিলাৰ মামুনুৰু ঘাইপথৰ সমীপেৰে যাত্ৰা কৰি থকা সামগ্ৰী পৰিবাহী ট্রাকখনৰ বিজুতিৰ বাবে নিয়ন্ত্ৰণ হেৰুৱাৰ ফলত কাষেৰে পাৰ হৈ যোৱা অট’ৰিক্সা দুখনক খুন্দা মাৰে। এই ঘটনাৰ উদ্ধাৰকাৰ্য চলি থকা হেতুকে স্থানীয় প্রশাসনে মৃত্যু হোৱা লোকৰ সংখ্যা অধিক হ’ব পাৰে বুলি আশংকা কৰিছে। আৰক্ষীয়ে ঘটনাস্থলীৰ পৰা আহতসকলক উদ্ধাৰ কৰি ততাতৈয়াকৈ চিকিৎসালয়লৈ প্ৰেৰণ কৰে। ৰাজ্যখনৰ মুখ্যমন্ত্ৰী ৰেৱন্থ ৰেড্ডীয়ে জিলাখনৰ প্ৰশাসনক আহতসকলক যথাসম্ভৱ উন্নত চিকিৎসা প্ৰদান কৰিবলৈ নিৰ্দেশ দিছে।