নিউজিলেণ্ডে ভাৰতৰ বিৰুদ্ধে বাংগালুৰুৰ এম ছিন্নস্বামী ষ্টেডিয়ামত অনুষ্ঠিত তিনিখনীয়া টেষ্ট ক্রিকেট শৃংখলাৰ প্ৰথমখন খেলত শক্তিশালী স্থিতিত উপনীত হৈছে। ভাৰতে ৪৬ ৰানতে প্রথম ইনিংছ সামৰাৰ পাছত আলহী দল নিউজিলেণ্ডে আজি দ্বিতীয় দিনৰ খেলৰ সামৰণিৰ পৰলৈকে প্ৰথম ইনিংছত ৩ টা উইকেট হেৰুৱাই ১৮০ ৰান সংগ্ৰহ কৰে। নিউজিলেণ্ড হাতত ৭টা উইকেট থকা অৱস্থাত ভাৰতৰ প্ৰথম ইনিংছতকৈ ১৩৪ ৰানত আগবাঢ়ি আছে। উল্লেখযোগ্য যে কালি বৰষুণৰ বাবে প্ৰথম দিনৰ খেল বাতিল কৰিবলগীয়া হৈছিল। শৃংখলাৰ দ্বিতীয়খন খেল ২৪ৰ পৰা ২৮ অক্টোবৰলৈ পুণেৰ মহাৰাষ্ট্ৰ ক্ৰিকেট এছোচিয়েছন ষ্টেডিয়ামত অনুষ্ঠিত হ’ব। তৃতীয় তথা অন্তিমখন খেল ১ৰ পৰা ৫ নৱেম্বৰলৈ মুম্বাইৰ ৱাংখেড়ে ষ্টেডিয়ামত খেলোৱা হ’ব।