কেন্দ্ৰীয় চৰকাৰে অসমৰ ডিব্ৰুগড় জিলাৰ পৰা সশস্ত্র বাহিনী বিশেষ ক্ষমতা আইন ১৯৫৮ কাইলৈৰ পৰা প্ৰত্যাহাৰৰ সিদ্ধান্ত গ্ৰহণ কৰিছে। যোৱা ২৪ মাৰ্চত কেন্দ্রীয় গৃহমন্ত্ৰ্যালয়ে অসম চৰকাৰক এই বিষয়ে জনাই আনুষ্ঠানিকভাৱে পত্ৰ প্ৰেৰণ কৰে। অসম চৰকাৰৰ গৃহ আৰু ৰাজনৈতিক বিভাগে কালি সন্ধিয়া এই সম্পৰ্কত জাৰি কৰা অধিসূচনা অনুসৰি ৰাজ্যখনৰ চৰাইদেউ, শিৱসাগৰ আৰু তিনিচুকীয়া জিলাত সশস্ত্র বাহিনী বিশেষ ক্ষমতা আইনৰ ম্যাদ কাইলৈৰ পৰা আৰু ছমাহলৈ বৃদ্ধি কৰা হৈছে। ডিব্ৰুগড় জিলাৰ পৰা আইনখন সম্পূৰ্ণৰূপে প্ৰত্যাহাৰ কৰা হৈছে। উল্লেখযোগ্য যে অসম চৰকাৰে নিষিদ্ধ উগ্রপন্থী সংগঠন আলফাৰ স্বাধীনপন্থী গোটহে ৰাজ্যখনৰ বিভিন্ন জিলাত সক্ৰিয় হৈ থকা আৰু কূটঘাতমূলক কার্যকলাপ অব্যাহত ৰখা বুলি কেন্দ্ৰলৈ প্ৰতিবেদন পঠিয়াইছিল আৰু উজনি অসমৰ তিনিচুকীয়া, শিৱসাগৰ আৰু চৰাইদেউ জিলাকহে অশান্ত অঞ্চল হিচাপে পৰৱৰ্তী ছমাহলৈ গণ্য কৰিবলৈ অনুৰোধ জনাইছিল। সেই অনুসৰি কেন্দ্ৰীয় চৰকাৰে এই সম্পৰ্কত আনুষ্ঠানিক অধিসূচনা জাৰি কৰাৰ পাছত অসম চৰকাৰৰ গৃহ আৰু ৰাজনৈতিক বিভাগে কালি এই সম্পৰ্কত অসমৰ ৰাজ্যপালৰ হৈ অধিসূচনা জাৰি কৰে।
একেদৰে মণিপুৰৰ ১৩ খন আৰক্ষী থানা এলেকা বাদ দি সমগ্ৰ ৰাজ্যখনত পৰৱৰ্তী ছমাহৰ বাবে সশস্ত্র বাহিনী বিশেষ ক্ষমতা আইন বলৱৎ ৰখাৰ বাবে গৃহমন্ত্ৰালয়ে সিদ্ধান্ত গ্ৰহণ কৰিছে। অৰুণাচল প্ৰদেশ আৰু নাগালেণ্ডতো এই সময়ছোৱাত আইনখন বলৱৎ কৰাৰ কথা গৃহমন্ত্ৰ্যালয়ে এটা বিবৃতিত প্ৰকাশ কৰিছে।