ঝাৰখণ্ড মুক্তি মৰ্চাৰ বিধায়িনী দলৰ নেতা হেমন্ত ছোৰেণে আজি চতুৰ্থবাৰৰ বাবে ঝাৰখণ্ডৰ মুখ্যমন্ত্ৰী হিচাপে শপতগ্ৰহণ কৰিছে। আজি বিয়লি ৰাঁচীৰ মোৰহাবাৰী খেলপথাৰত আয়োজিত এটা আড়ম্বৰপূৰ্ণ অনুষ্ঠানত ৰাজ্যপাল সন্তোষ কুমাৰ গংগোৱাৰে তেওঁক কাৰ্যভাৰ গ্ৰহণ আৰু গোপনীয়তা ৰক্ষাৰ শপতবাক্য পাঠ কৰোৱায়। শপতগ্ৰহণ অনুষ্ঠানত কংগ্ৰেছ সভাপতি মল্লিকার্জুন খাৰ্গে, লোকসভাৰ বিৰোধী দলপতি ৰাহুল গান্ধী, পশ্চিমবংগৰ মখ্যমন্ত্রী মমতা বেনাৰ্জী, মেঘালয়ৰ মুখ্যমন্ত্ৰী কনৰাড চাংমা, পাঞ্জাবৰ মুখ্যমন্ত্ৰী ভগৱন্ত মান, হিমাচল প্ৰদেশৰ মুখ্যমন্ত্ৰী সুখবিন্দৰ সিং সুখু, আম আদমী পাৰ্টীৰ নেতা অৰবিন্দ কেজৰিৱাল, সমাজবাদী পাৰ্টীৰ নেতা অখিলেখ যাদৱ, পি ডি পিৰ নেত্ৰী মেহমুবা মুফতি, শিৱসেনাৰ নেতা উদ্ধৱ ঠাকৰে আৰু আৰ জে ডিৰ নেতা তেজস্বী যাদৱকে ধৰি ইণ্ডি মৰ্চাৰ ভালেকেইগৰাকী নেতা উপস্থিত আছিল। উল্লেখযোগ্য যে সদ্যসমাপ্ত বিধানসভা নিৰ্বাচনত ঝাৰখণ্ড মুক্তিমৰ্চা নেতৃত্বাধীন মৰ্চাই বিধানসভাৰ ৮১ খন আসনৰ ভিতৰত ৫৬ খন আসন লাভ কৰি নিৰংকুশ সংখ্যাগৰিষ্ঠতা অৰ্জন কৰিছিল। ৪৯ বছৰীয়া হেমন্ত ছোৰেন ঝাৰখণ্ডৰ চতুৰ্দশগৰাকী মুখ্যমন্ত্ৰী হ’ব।