জম্মু-কাশ্মীৰ বিধানসভা নিৰ্বাচনৰ প্ৰথম পৰ্যায়ৰ বাবে সকলো প্ৰস্তুতি সম্পূৰ্ণ হৈ উঠিছে। ৭ খন জিলাৰ ২৪ খন বিধানসভা আসনৰ কাইলৈ প্রথম পর্যায়ত ভোটগ্রহণ কৰা হ’ব। এই জিলাকেইখন হৈছে অনন্তনাগ, পুলৱামা, শ্বপিয়ান, কুলগাম, দ’দা, ৰামবান আৰু কিষ্টৱাৰ। ইয়াৰে ১৬টা সমষ্টি কাশ্মীৰ মণ্ডলৰ আৰু ৮টা জম্মুৰ মণ্ডলৰ অধীনৰ। এই প্ৰথম পৰ্যায়ত ৫ লাখ ৬৬ হাজাৰ যুৱ ভোটদাতাকে ধৰি মুঠ ২৩ লাখ ২৭ হাজাৰৰো অধিক ভোটদাতাই ২১৯ গৰাকী প্ৰাৰ্থীৰ নির্বাচনী ভাগ্য নির্ণয় কৰিব। ভোটগ্রহণ সুকলমে অনুষ্ঠিত কৰাৰ উদ্দেশ্যে নির্বাচন আয়োগে ২৪টা বিধানসভা সমষ্টিত মুঠ ৩,২৭৬টা ভোটগ্রহণ কেন্দ্ৰ স্থাপন কৰিছে। ভোটদাতাসকলক ভোটদানৰ বাবে উৎসাহিত কৰাৰ উদ্দেশ্যে মুখ্য নির্বাচনী বিষয়া পি কে পলে কালি ভোট কা ত্যোহাৰ শীৰ্ষক এটা বিশেষ গীত মুকলি কৰে।