জম্মু-কাশ্মীৰত কালি সংঘটিত সন্ত্রাসবাদী আক্ৰমণত জড়িত সন্ত্রাসবাদীসকলক কৰায়ত্ত কৰাৰ বাবে যুটীয়া অভিযান অব্যাহত আছে। জম্মু-কাশ্মীৰত কালি কাঠুৱা জিলাৰ মাচেদি অঞ্চলত সংঘটিত সন্ত্রাসবাদী আক্ৰমণৰ পাছত নিৰাপত্তা বাহিনীয়ে সন্ত্ৰাসবাদীকেইটাৰ সম্ভেদ উলিয়াবলৈ বৃহৎ যৌথ তালাচী অভিযান আৰম্ভ কৰিছে। আকাশবাণী জম্মুৰ সংবাদদাতাই প্ৰকাশ কৰা অনুসৰি স্থলপথেৰে তালাচী চলোৱা দলসমূহক হেলিকপ্টাৰ আৰু UAV নিৰীক্ষণৰ দ্বাৰা সহায় কৰা হৈছে। অঞ্চলটোৰ কিছুমান ঘন বনাঞ্চলৰ ওপৰত গুৰুত্ব আৰোপ কৰি এই অভিযানত স্নিফাৰ ডগ আৰু মেটেল ডিটেক্টৰ ব্যৱহাৰ কৰা হৈছে। কঠুৱা জিলাৰ মাচেডি, বাদনোটে, কিগুলি আৰু লোহাই অঞ্চলত সেনা, আৰক্ষী আৰু চি আৰ পি এফে যুটীয়া কৰ্ডন আৰু তালাচী অভিযান আৰম্ভ কৰিছে। অধিকাংশ বিদেশীৰে গঠিত তিনিৰ পৰা চাৰিজন সন্ত্ৰাসবাদী এই আক্ৰমণত জড়িত থকাৰ সন্দেহ কৰা হৈছে। সন্ত্ৰাসবাদীকেইটা যোৱা ২৮ এপ্ৰিলত বসন্তগড় আক্ৰমণত পানাৰা গাঁৱত সন্ত্ৰাসবাদীৰ সৈতে হোৱা সংঘৰ্ষত নিহত গাঁওৰক্ষী মহম্মদ শ্বৰীফৰ ঘটনাৰ সৈতে জড়িত একেটা গোটৰ অংশ।