বিশ্ব ঐতিহ্য ক্ষেত্ৰৰূপে স্বীকৃতি পোৱাৰ পাছতে চৰাইদেউ জিলাত নিবনুৱা সংস্থাপনৰ লগতে পৰ্যটকসকলৰ বাবে থকামেলাৰ পৰ্যাপ্ত সুবিধা উপলব্ধ কৰোৱাৰ লক্ষ্যৰে আমাৰ আলহী ঘৰ আঁচনি আৰম্ভ কৰা হৈছে। এই আঁচনিৰ অধীনত ৰাজ্য চৰকাৰৰ পৰ্যটন বিভাগে চৰাইদেউ মৈদাম ক্ষেত্ৰৰ আশেপাশে হোম ষ্টে নিৰ্মাণ কৰাৰ লক্ষ্য লৈছে। এই আঁচনি আধাৰশিলা স্থাপন কৰি কালি সোণাৰি সমষ্টিৰ বিধায়ক ধৰ্মেশ্বৰ কোঁৱৰে প্ৰাৰম্ভিক পৰ্যায়ত মৈদামৰ সমীপৱৰ্তী অঞ্চলত ১০ টাকৈ হোম ষ্টে নিৰ্মাণ কৰাৰ লক্ষ্য লোৱা বুলি জানিবলৈ দিয়ে। তেওঁ কয় যে, আঁচনিখনৰ অধীনত চলিত বৰ্ষৰ বাবে ১০টা ঘৰ নিৰ্মাণৰ আধাৰশিলা স্থাপন কৰা হৈছে যদিও পৰৱৰ্তী সময়ত অঞ্চলটোলৈ পৰ্যটকৰ আগমণৰ হাৰ বৃদ্ধি পালে নতুনকৈ কমেও ৪০টা এনে হোম ষ্টে নিৰ্মাণ কৰা হ’ব।