গোৱালপাৰা জিলাৰ আয়ুক্ত খনীন্দ্ৰ চৌধুৰীয়ে আজি গোৱালপাৰা সংমণ্ডলৰ লেলা গাঁৱত উপস্থিত হৈ গোবৰ্ধন আঁচনিৰ অগ্ৰগতি পর্যবেক্ষণ কৰে। আয়ুক্তগৰাকীয়ে বিনামূলীয়াকৈ জৈৱ গেছৰ যোগান লাভ কৰা হিতাধিকাৰীসকলৰ সৈতে মত-বিনিময় কৰে। স্বচ্ছ ভাৰত অভিযানৰ প্ৰদূষণ ৰোধ তথা স্বচ্ছ পৰিবেশ গঢ়ি তোলাৰ লক্ষ্যৰ সৈতে সংগতি ৰাখি দেশত গোবৰ্ধন আঁচনি ৰূপায়ণ কৰা হৈছে। এই আঁচনিৰ জৰিয়তে গোটা আবৰ্জনা নিষ্কাষণৰ উপৰি এই আবৰ্জনাৰ পৰা জৈৱ গেছ উৎপন্ন কৰি জনসাধাৰণক উপকৃত কৰাৰ লক্ষ্য লোৱা হৈছে। জনস্বাস্থ্য কাৰিকৰী বিভাগ গোৱালপাৰা সংমণ্ডলে জিলাখনৰ লেলা গাঁৱত ৩০ ঘন মিটাৰ জৈৱ গেছৰ ক্ষেত্ৰ স্থাপন কৰি ২১টা পৰিয়ালক বিনামূলীয়া জৈৱ গেছ সংযোগৰ সুবিধা দিছে। এই আঁচনিৰ জৰিয়তে পশুধনৰ মল নিষ্কাষণৰ সুব্যৱস্থাও কৰা হৈছে। গোটা আবর্জনা তথা পশুধনৰ মলৰ পৰা জৈৱ গেছ উৎপন্ন কৰাৰ পাছত ৰৈ যোৱা আবৰ্জনাসমূহ সাৰ হিচাপে খেতিত প্ৰয়োগ কৰা হৈছে।