স্বাস্থ্য আৰু পৰিয়াল কল্যাণ তথা গোৱালপাৰা জিলাৰ অভিভাৱক মন্ত্রী অশোক সিংহলে আজি জিলাখনৰ ঐতিহাসিক উপদ বিলত উপস্থিত হৈ বিজেপিৰ এখন কৰ্মী সভাত অংশগ্ৰহণ কৰাৰ লগতে বিলখন পৰিদৰ্শন কৰে। বিলখন পৰিদৰ্শন কৰি তেওঁ কয়,যে ৰাজ্য চৰকাৰৰ ফালৰ পৰাও বিলখনৰ যথেষ্ট উন্নয়ন কৰা হৈছে যদিও ইয়াৰ অধিক উন্নয়নৰ বাবে কেন্দ্ৰীয় চৰকাৰলৈ প্ৰস্তাৱ প্ৰেৰণ কৰা হৈছে। বিলখনৰ কিছু অংশ বেদখলকাৰীৰ কৱলত পৰিছে। তেওঁ কয়, যে চৰকাৰে বেদখল মুক্ত কৰিবলৈ কঠোৰ ব্যৱস্থা গ্ৰহণ কৰিব। আগিয়াৰ সমীপত থকা প্ৰায় ৩,৫০০ বিঘা আয়তনৰ বিলখনক অধিক আকর্ষণীয় কৰি তোলাৰ বাবে জিলা প্রশাসনে কেতবোৰ আঁচনি হাতত লৈছে। ইয়াৰে অংশ হিচাপে লোকনিৰ্মাণ বিভাগে ৩,৫০০ বিঘা আয়তনৰ ভূমি আঁৱৰি থকা বিলখনৰ চাৰিওফালে ১৮ কোটি টকা ব্যয়ৰে মথাউৰি নিৰ্মাণ কৰি খোজকঢ়াৰ ব্যৱস্থা গ্ৰহণ কৰিছে। লগতে বিলখন সংৰক্ষণৰ ব্যৱস্থা কৰি বনভোজস্থলী আৰু পৰ্যটনস্থলী হিচাপে গঢ় দিয়াৰ ক্ষেত্ৰত স্থানীয় ৰাইজেও সহযোগ আগবঢ়াইছে।