যুৱক-যুৱতীসকলক কৃষি কৰ্মৰ প্ৰতি আগ্ৰহী কৰি তুলিবলৈ মুখ্যমন্ত্ৰী হিমন্ত বিশ্ব শৰ্মাই জনোৱা আহ্বান মৰ্মে গোলাঘাট জিলাৰ মৰঙী পথাৰৰ ৰামধেনু কৃষি পামত আজি ফচল চপোৱা কাৰ্যসূচী শুভাৰম্ভ কৰা হয়।
বিত্তমন্ত্ৰী অজন্তা নেওগ আৰু বিধায়ক বিশ্বজিৎ ফুকনে কাতি আৰু আঘোণ মাহৰ দোমাহীৰ দিনা এই ধান দোৱা কাৰ্যসূচী মুকলি কৰে। কাৰ্যসূচীৰ সৈতে সংগতি ৰাখি মৰঙী অঞ্চলত বিধায়ক বিশ্বজিৎ ফুকনৰ নেতৃত্বত দুবছৰ পূৰ্বে প্ৰতিষ্ঠা কৰা ৰামধেনু বহুমুখী সমবায় সমিতিৰ মুখ্য কাৰ্যালয়ো আজি বিত্তমন্ত্রী শ্রীনেওগে উদ্বোধন কৰে।
এই অনুষ্ঠানত গোলাঘাট জিলা উন্নয়ন আয়ুক্ত, নুমলীগড় শোধনাগাৰৰ মুখ্য প্ৰৱন্ধক, কৃষি বিশ্ববিদ্যালয় আৰু কৃষি বিজ্ঞান কেন্দ্ৰ তথা জিলা প্ৰশাসনৰ বিষয়া কৰ্মচাৰীসকল উপস্থিত থাকে।