গুৱাহাটী মহানগৰৰ পূৱ প্ৰান্তত অৱস্থিত উচ্চ শিক্ষাৰ পূৰণি প্ৰতিষ্ঠান গুৱাহাটী মহাবিদ্যালয়ৰ প্ৰতিষ্ঠাৰ হীৰক জয়ন্তীৰ সামৰণিৰ বাবে ইতিমধ্যে ব্যাপক প্ৰস্তুতি আৰম্ভ হৈছে। এই উপলক্ষে আজি হীৰক জয়ন্তী সমাৰোহৰ লাইখুঁটা স্থাপন কৰা হয়। লাইখুঁটা স্থাপন অনুষ্ঠানত অংশগ্ৰহণ কৰি মহাবিদ্যালয়খনৰ অধ্যক্ষ তথা উপাধ্যক্ষাই সকলোৰে সহযোগিতা কামনা কৰাৰ লগতে প্ৰস্তুতিৰ বিভিন্ন দিশ সম্পর্কে আলোকপাত কৰে। অহা ৯ নৱেম্বৰত অনুষ্ঠিত হবলগীয়া সামৰণি অনুষ্ঠানত প্ৰদর্শনী, বক্তৃতা অনুষ্ঠান, আন্তঃমহাবিদ্যালয় ভলীবল প্রতিযোগিতা, সাংস্কৃতিক অনুষ্ঠান, নাট্যাভিনয়, সতীর্থ সন্মিলন, প্ৰাক্তন ছাত্ৰ-ছাত্ৰী সমাৰোহ, স্মাৰক উন্মোচন, গ্রন্থ উন্মোচন আদি বিভিন্ন কাৰ্যসূচী হাতত লোৱা হৈছে। অনুষ্ঠানৰ লগত সংগতি ৰাখি আয়োজিত বিভিন্ন কাৰ্যসূচীত অসমৰ শৈক্ষিক -বৌদ্ধিক জগতৰ কেইবাগৰাকীও বৰেণ্য ব্যক্তিয়ে অংশগ্রহণ কৰিব। এই সমাৰোহৰ বিশেষ কাৰ্যসূচী হৈছে পৰহিলৈ গুৱাহাটী বিশ্ববিদ্যালয় অধীনস্থ মহাবিদ্যালয়সমূহৰ মাজত দিবা-নৈশ প্ৰাইজমানি ভলীবল প্ৰতিযোগিতা অনুষ্ঠিত হ’ব।