গুৱাহাটীৰ উলুবাৰীত থকা অসম আৰক্ষীৰ মুখ্য কাৰ্যালয়ত দুদিনীয়া কাৰ্যসূচীৰে অসম আৰক্ষীৰ বৰ্তমানৰ আৰু প্ৰাক্তন শীৰ্ষ বিষয়াসকলৰ পুনৰমিলন সন্মিলন অনুষ্ঠিত হয়। কালিৰে পৰা হোৱা সন্মিলনখনৰ আজি বিয়লি সামৰণি পৰে। সামৰণি অনুষ্ঠানত ৰাজ্যপাল লক্ষ্মণ প্রসাদ আচার্য উপস্থিত থাকে। অসম আৰক্ষীৰ বৰ্তমানৰ আৰু প্ৰাক্তন শীর্ষক বিষয়াসকলে পুনৰমিলন সন্মিলনত অংশগ্ৰহণ কৰি আৰক্ষীয়ে সন্মুখীন হোৱা বিভিন্ন পৰিস্থিতি সন্দৰ্ভত আলোচনা কৰে। প্ৰাক্তন আৰক্ষী সঞ্চালক প্ৰধানসকলৰ অভিজ্ঞতাৰে অনাগত সময়ত ৰাজ্যখনৰ আইন-শৃংখলাজনিত পৰিস্থিতিৰ ক্ষেত্ৰত কেনেদৰে ত্বৰান্বিত কৰিব পাৰি সেই বিষয়েও বৈঠকত আলোচনা কৰা হয়। প্ৰথম বাৰৰ বাবে অনুষ্ঠিত হোৱা এই সন্মিলনৰ সামৰণি অনুষ্ঠানত ভাগ লৈ ৰাজ্যপাল লক্ষ্মণ প্ৰসাদ আচাৰ্যই অসম আৰু মেঘালয় কেডাৰৰ প্ৰাক্তন আৰক্ষী সঞ্চালক প্ৰধানসকলৰ সৈতে মিলিত হয়। লগতে অসম আৰক্ষীক উদ্দেশ্যি ৰাজ্যপালগৰাকীয়ে সকলোৱে মিলি নতুন কিবা এটা কৰাৰ বাবে আহ্বান জনায়।