গুৱাহাটীত অনুষ্ঠিত হ’বলগা দুখনকৈ আই পি এল খেলত অংশ লোৱাৰ বাবে আজি মহানগৰীত ৰাজস্থান ৰয়েলছৰ খেলুৱৈসকল উপস্থিত হ’ব। বিয়লি ৪ বাজি ৪৫ মিনিটত বৰঝাৰ বিমান বন্দৰত দলটোৰ বিশেষ বিমানে অবতৰণ কৰিব। ইফালে কালি আবেলি পঞ্জাব কিংছ দলো গুৱাহাটীত উপস্থিত হৈছে। আজি পঞ্জাব কিংছৰ খেলুৱৈসকলে বৰ্ষাপাৰাৰ এ চি এ ষ্টেডিয়ামত বিয়লি ৪ বাজি ৪৫ মিনিটত অনুশীলন কৰিব। উল্লেখযোগ্য যে ইণ্ডিয়ান প্রীমিয়াৰ লীগৰ প্ৰথম চিজনৰ চেম্পিয়ন ৰাজস্থান ৰয়েলছে চলিত ১৭ সংখ্যক আই পি এলৰ অন্তিম দুখন খেল বর্ষাপাৰাৰ এ চি এ ষ্টেডিয়ামত খেলিব। সঞ্জু ছেমছনে নেতৃত্ব দিয়া দলটোৱে অহা ১৫ মে’ত গুৱাহাটীত হ’বলগীয়া প্ৰথমখন খেলত পঞ্জাব কিংছৰ বিৰুদ্ধে খেলাৰ বিপৰীতে অহা ১৯ মে’ত দলটোৱে কলকাতা নাইট ৰাইডাৰ্ছৰ মুখামুখি হ’ব।