এডভান্টেজ আছামৰ দ্বিতীয় সংস্কৰণত অংশগ্ৰহণৰ বাবে আজি জাপানৰ উদ্যোগপতি ট’চিয়াকী নিচিকাৱা নেতৃত্বাধীন এটা প্রতিনিধি দল গুৱাহাটীত উপস্থিত হয়। দলটোৱে বিমান বন্দৰৰ পৰা পোনে পোনে গুৱাহাটী বিশ্ববিদ্যালয়লৈ যায়। প্রতিনিধি দলটোৱে বিশ্ববিদ্যালয়ৰ উপাচাৰ্য ড০ ননীগোপাল মহন্তৰ সৈতে গুৱাহাটী বিশ্ববিদ্যালয় আৰু জাপানৰ বিভিন্ন ব্যৱসায়িক প্ৰতিষ্ঠানৰ সৈতে শৈক্ষিক সহযোগিতা আগবঢ়াই নিয়াৰ সন্দৰ্ভত আলোচনাত মিলিত হয়। উপাচার্যগৰাকীয়ে বিশ্ববিদ্যালয়খনৰ শৈক্ষিক আৰু আন্তঃগাঁথনিমূলক সক্ষমতা সন্দৰ্ভত প্রতিনিধি দলটোক অৱগত কৰে। জাপানৰ দলটোৱে উত্তৰ-পূৰ্বাঞ্চলৰ বিশেষকৈ অসমৰ ল’ৰা-ছোৱালীক জাপানী ভাষা আৰু আচৰণগত দিশসমূহৰ প্ৰশিক্ষণ দিয়াৰ বাবে আগ্ৰহ প্ৰকাশ কৰে। তেওঁলোকে লগতে কাৰিকৰী আৰু বিজ্ঞান ক্ষেত্ৰসমূহত গুৱাহাটী বিশ্ববিদ্যালয়ৰ চূড়ান্ত বৰ্ষৰ শিক্ষাৰ্থীসকলক জাপানী ভাষাৰ জ্ঞান দি তেওঁলোকক বৃত্তিগতভাৱে সাজু কৰি তোলাৰ বাবেও আগ্ৰহ প্ৰকাশ কৰে বুলি বিশ্ববিদ্যালয় কর্তৃপক্ষই জানিবলৈ দিয়ে।