উপ-ৰাষ্ট্ৰপতি শ্রীজগদীপ ধনখড় আৰু প্ৰধানমন্ত্ৰী নৰেন্দ্ৰ মোদীয়ে জ্যেষ্ঠ কংগ্ৰেছ নেতা তথা গুজৰাটৰ প্ৰাক্তন ৰাজ্যপাল ড° কমলা বেনিৱালৰ মৃত্যুত গভীৰ শোক প্ৰকাশ কৰিছে৷ সামাজিক মাধ্যমৰ এটা পোষ্টত শ্ৰীধনখড়ে ড° বেনিৱালক এগৰাকী দক্ষ প্রশাসক আৰু মহিলা সবলীকৰণৰ উদাহৰণ বুলি অভিহিত কৰে। প্রধানমন্ত্রী মোদীয়ে সামাজিক মাধ্যমযোগে দিয়া এটা শোকবার্তাত কয় যে ৰাজস্থানৰ ৰাজনীতিত তেওঁৰ উল্লেখযোগ্য বৰঙণি আছে। ড° বেনিৱালৰ মৃত্যুত ৰাজস্থানৰ ৰাজ্যপাল কলৰাজ মিশ্র, মুখ্যমন্ত্ৰী ভজনলাল শৰ্মা আৰু প্ৰাক্তন মুখ্যমন্ত্রী অশোক গেহলটকে ধৰি অন্যান্য নেতাসকলেও শোক প্ৰকাশ কৰিছে। প্ৰয়াত বেনিৱালে গুজৰাটৰ উপৰি ত্ৰিপুৰা আৰু মিজোৰামৰ ৰাজ্যপাল হিচাপে কাৰ্যনিৰ্বাহ কৰিছিল। সাতবাৰকৈ বিধায়ক হিচাপে নির্বাচিত ড° বেনিৱালে ৰাজস্থানৰ উপ-মুখ্যমন্ত্ৰীৰ দায়িত্বও গ্রহণ কৰিছিল।