কোকৰাঝাৰৰ ভাৰতীয় ক্রীড়া প্ৰাধিকৰণৰ ষ্টেডিয়ামত অহা ৩০ জুলাইৰ পৰা ২৫ আগষ্টলৈ ১৩৩ সংখ্যক ডুৰাণ্ড কাপ ফুটবল প্রতিযোগিতা অনুষ্ঠিত হ’ব। এই উপলক্ষে বিটিচিৰ ক্ৰীড়া আৰু যুৱ কল্যাণ বিভাগে বিটিআৰৰ ৫খন জিলাত আজিৰে পৰা ১৫ জুলাইলৈ ট্ৰফী ভ্ৰমণ আৰু প্ৰদৰ্শনৰ ব্যৱস্থা গ্ৰহণ কৰিছে। এই অভিযানৰ অংশ হিচাপে আজি তামুলপুৰ উচ্চতৰ মাধ্যমিক বিদ্যালয়ৰ খেলপথাৰত ডুৰাণ্ড কাপ টুফী ভ্ৰমণ কাৰ্যসূচীৰ আয়োজন কৰা হয়। ইয়াৰ পাছতে জিলা সদৰত ভাৰতীয় সেনা বাহিনী, ৰাজ্য চৰকাৰ আৰু বিটিআৰ প্ৰশাসনৰ উদ্যোগত প্রতিযোগিতাৰ ট্ৰফী প্ৰদৰ্শন কৰি এটা শোভাযাত্ৰা উলিওৱা হয়। ইয়াৰ পাছতে তামুলপুৰ উচ্চতম মাধ্যমিক বিদ্যালয় খেলপথাৰত তামুলপুৰ এফ চি আৰু পাটকীজুলি মাইনাও ক্লাৱৰ মাজত এখন প্ৰদৰ্শনী ফুটবল খেল অনুষ্ঠিত হয়। কাৰ্যসূচীৰ অংশ হিচাপে কাইলৈ বাক্সা আৰু পৰহিলৈ কোকৰাঝাৰত ট্ৰফী প্ৰদৰ্শন কৰা হ’ব। আজিৰ অনুষ্ঠানত জিলা আয়ুক্ত বিদ্যুৎ বিকাশ ভাগৱতী, বিটিআৰৰ ক্ৰীড়া আৰু যুৱ কল্যাণ বিভাগৰ কাৰ্যবাহী সদস্য দাওবৈচা বড়ো, পৰ্যটন বিভাগৰ কাৰ্যবাহী সদস্য ধৰ্মনাৰায়ণ দাসকে ধৰি ভালেমান ব্যক্তি উপস্থিত থাকে।