কাশ্মীৰ উপত্যকাৰ অনন্তনাগ জিলাৰ হলকনগলি এলেকাত আজি দুপৰীয়া সুৰক্ষা বাহিনীৰ সৈতে হোৱা সংঘর্ষত দুজন সন্ত্রাসবাদী নিহত হয়। শ্ৰীনগৰস্থিত চিনাৰকোৰে সামাজিক মাধ্যমযোগে প্ৰকাশ কৰা মতে, সেনা বাহিনীয়ে হলকনগলিৰ সমীপত সন্ত্ৰাসবাদীৰ সন্দেহজনক গতি-বিধি প্রত্যক্ষ কৰে আৰু ততালিকে অভিযান আৰম্ভ কৰে। ইয়াৰ পাছতে অঞ্চলটোত আত্ম-গোপন কৰি থকা সন্ত্ৰাসবাদীৰ দলে সেনা বাহিনীক প্ৰত্যক্ষ কৰি নিৰ্বিচাৰে গুলীচালনা কৰে। প্ৰত্যুত্তৰত সেনা বাহিনীয়েও গুলী চলোৱা দুজন সন্ত্রাসবাদী নিহত হয়। নিহত সন্ত্ৰাসবাদী দুজনৰ পৰিচয় এতিয়াও জানিব পৰা হোৱা নাই। আমালৈ বাতৰি অহাৰ পৰলৈকে অঞ্চলটোত সেনাৰ অভিযান অব্যাহত আছিল।
ইপিনে, শ্ৰীনগৰ চহৰৰ খনয়াৰ অঞ্চলত সুৰক্ষা বাহিনী আৰু সন্ত্ৰাসবাদীৰ মাজত গুলিয়াগুলী অব্যাহত আছে। সেনা বাহিনীয়ে অঞ্চলটো ঘেৰি ধৰি অভিযান চলোৱাৰ সময়ত এই গুলিয়াগুলীৰ সূত্ৰপাত হোৱা বুলি জানিব পৰা গৈছে।