ওড়িয়া সাহিত্যৰ প্ৰখ্যাত আধুনিক কবি, পদ্মভূষণ সন্মানেৰে সন্মানিত ৰমাকান্ত ৰথৰ আজি পুৱা ভূৱনেশ্বৰত দেহাৱসান হয়। মৃত্যুৰ সময়ত তেওঁৰ বয়স আছিল ৯১ বছৰ। তেওঁৰ মৃত্যুত উড়িয়া সাহিত্যৰ এটা যুগৰ অৱসান ঘটিল। ১৯৫৭ বৰ্ষৰ এগৰাকী ভাৰতীয় প্ৰশাসনিক সেৱা বিষয়া ৰমাকান্ত ৰথে ওড়িশাৰ মুখ্য সচিব হিচাপেও কাৰ্যনিৰ্বাহ কৰাৰ লগতে কেন্দ্ৰীয় চৰকাৰৰ কেইবাটাও গুৰুত্বপূৰ্ণ স্থানত সেৱা আগবঢ়াইছিল। তেওঁৰ সাহিত্য কৰ্মৰাজি ইংৰাজীৰ লগতে আন কেইবাটাও ভাৰতীয় ভাষালৈ অনুবাদ কৰা হৈছে। সাহিত্য জগতলৈ আগবঢ়োৱা অনবদ্য অৱদানৰ স্বীকৃতিস্বৰূপে ২০০৬ চনত তেওঁক তৃতীয় সৰ্বোচ্চ অসামৰিক সন্মান পদ্মভূষণেৰে সন্মানিত কৰা হৈছিল । ইয়াৰ উপৰি আন বহুতো সাহিত্য সন্মানেৰে সন্মানিত ৰমাকান্ত ৰথে ১৯৯৮ চনৰ পৰা ২০০৩ চনলৈ সাহিত্য একাডেমীৰ সভাপতি হিচাপে সেৱা আগবঢ়াইছিল। কাইলৈ পুৰীৰ স্বৰ্গদুৱাৰত শেষকৃত্য সম্পন্ন কৰা হ’ব। ওড়িশাৰ মুখ্যমন্ত্ৰী মোহন চৰণ মাঝিয়ে ৰমাকান্ত ৰথৰ মৃত্যুত গভীৰ শোক প্ৰকাশ কৰিছে। এটা শোকবার্তাত শ্ৰীমাঝিয়ে কয় যে ৰমাকান্ত ৰথৰ সাহিত্য সৃষ্টিয়ে ওড়িয়া সাহিত্যক ৰাষ্ট্ৰীয় তথা আন্তৰাষ্ট্ৰীয় পৰ্যায়ত এটা নতুন পৰিচয় গঢ় দিবলৈ সমৰ্থ হৈছে।