ৰাজ্যৰ আভ্যন্তৰীণ জল পৰিবহন আৰু জলপথৰ আন্তঃগাঁথনি উন্নয়নৰ বাবে অহা ৫ বছৰত ৪৮০০ কোটি টকাতকৈও অধিক ধন বিনিয়োগ কৰা হ’ব। কেন্দ্ৰীয় বন্দৰ, জাহাজ পৰিবহন আৰু জল পৰিবহন মন্ত্ৰী সৰ্বানন্দ সোণোৱালে কালি গুৱাহাটীত আয়োজিত এডভান্টেজ আছাম সন্মিলনত এই কথা প্ৰকাশ কৰে। কালি পথ পৰিবহন, ৰে’লৱে আৰু নদী বিষয়ক এখন আলোচনা সত্ৰত দিয়া ভাষণত মন্ত্ৰীগৰাকীয়ে এই কথা উল্লেখ কৰি কয় যে প্রধানমন্ত্ৰী নৰেন্দ্ৰ মোদী আত্মনিৰ্ভৰ ভাৰতৰ সংকল্প গ্ৰহণ কৰি দেশ নিৰ্মাণৰ দিশত অগ্ৰসৰ হৈছে। অসমে এই পথেৰে আগবাঢ়ি যাব লাগিব বুলি শ্ৰীসোণোৱালে মন্তব্য কৰে। ২০১৪ চনৰ পৰা আভ্যন্তৰীণ জলপথ খণ্ডত বিশেষ গুৰুত্ব আৰোপ কৰা হৈছে বুলি উল্লেখ কৰি শ্ৰীসোণোৱালে ব্ৰহ্মপুত্ৰ আৰু বৰাককে ধৰি নদী প্ৰণালীৰ সমৃদ্ধ নেটৱৰ্কৰ সৈতে ৰাজ্যখনৰ আভ্যন্তৰীণ জলপথসমূহে অর্থনৈতিক বিকাশত অতিশয় গুৰুত্বপূৰ্ণ ভূমিকা পালন কৰিব বুলি আশা প্ৰকাশ কৰে। তেওঁ নৌকা আঁচনিৰ অধীনত ২০৩০ চনৰ ভিতৰত অসমত সেউজ জাহাজৰ বাবে ১৫০০ কোটি টকা আবণ্টনৰ কথা ঘোষণা কৰে। তদুপৰি ২০২৭-২৮ বৰ্ষৰ ভিতৰত ব্ৰহ্মপুত্ৰ আৰু বৰাক নদীত পৰ্যটনৰ সুবিধাৰ বাবে কার্গো চলাচল বৃদ্ধি কৰিবলৈ ১৫০০ কোটি টকা ধাৰ্য কৰা বুলি তেওঁ ঘোষণা কৰে। মন্ত্ৰীগৰাকীয়ে কয় যে জলপথ সূচল কৰি তোলাৰ বাবে ২০২৬ৰ পৰা ২০২৭ চনলৈকে বাংলাদেশ সীমান্তৰ পৰা ব্ৰহ্মপুত্ৰ পাণ্ডুলৈ জলপথৰ ন্যূনতম আঢ়ৈ মিটাৰ গভীৰতা নিশ্চিত কৰাৰ বাবে ভাৰতীয় ড্রেজিং সংস্থাক দায়িত্ব অর্পণ কৰি ইয়াৰ বাবে ১৯১ কোটি টকা ধাৰ্য কৰা হৈছে। কালিৰ অনুষ্ঠানতে শ্ৰীসোণোৱালে ৩১৫ কোটি টকা বিনিয়োগেৰে গুৱাহাটী আৰু ধুবুৰীত ৱাটাৰ মেট্ৰ’ সেৱাৰ বিকাশৰ কথাও ঘোষণা কৰে। মন্ত্ৰীগৰাকীয়ে ব্ৰহ্মপুত্ৰ আৰু বৰাক নদীকেন্দ্ৰিক এহেজাৰ ১০ কোটি টকাৰ প্ৰকল্প কেন্দ্ৰীয় জলপথ প্ৰাধিকৰণে ৰূপায়ণ কৰা বুলি জানিবলৈ দিয়ে।