উচ্চতৰ মাধ্যমিক চূড়ান্ত পৰীক্ষাত পৰিক্ষাৰ্থীসকলৰ বাবে অনলাইন প্ৰ-পত্ৰ পূৰণৰ প্ৰক্ৰিয়া অহা ৮ নৱেম্বৰৰ পৰা আৰম্ভ হ’ব। এই প্ৰক্ৰিয়া ৩০ নৱেম্বৰত অন্ত পৰিব। অসম ৰাজ্যিক বিদ্যালয় শিক্ষা পৰিষদে অহা বছৰৰ ফেব্ৰুৱাৰী-মার্চ মাহত উচ্চতৰ মাধ্যমিক চূড়ান্ত পৰীক্ষা অনুষ্ঠিত কৰাৰ পৰিকল্পনা কৰিছে। সেই অনুসৰি প্ৰ-পত্ৰ পূৰণৰ প্ৰক্ৰিয়া আৰম্ভ কৰাৰ লগতে এই সংক্রান্তত সংশ্লিষ্ট প’ৰ্টেলৰ বিষয়ে নিৰ্দিষ্ট সময়ত পৰীক্ষাৰ্থীসকলক অৱগত কৰা হ’ব বুলি পৰিষদে এটা নিৰ্দেশনাযোগে প্ৰকাশ কৰিছে। উল্লেখযোগ্য যে প্ৰ-পত্ৰ পূৰণৰ বাবে কোনোধৰণৰ অফলাইন ব্যৱস্থা নাথাকিব বুলি পৰিষদে প্ৰকাশ কৰিছে।