গুজৰাটৰ আনন্দৰ সমীপৰ আহমেদাবাদ-বড়োদাৰা এক্সপ্ৰেছৱেত আজি পুৱা সংঘটিত এটা পথ দুৰ্ঘটনাত ছজন লোকৰ মৃত্যু হোৱাৰ লগতে কেইবাগৰাকীও ব্যক্তি গুৰুতৰভাবে আহত হয়। আকাশবাণীৰ সংবাদদাতাৰ তথ্য অনুসৰি চিখৰা গাঁৱৰ সমীপত এখন ট্ৰাকে পথৰ দাঁতিত ৰৈ থকা বাছ এখনত খুন্দিওৱাৰ ফলতেই দুর্ঘটনাটো সংঘটিত হয়। উল্লেখযোগ্য যে টায়াৰ ফুটাৰ পৰিপ্ৰেক্ষিতত বাছখন মেৰামতিৰ বাবে পথৰ দাঁতিত ৰখাই থোৱা হৈছিল। আনন্দ গ্রাম্য আৰক্ষীয়ে জনাইছে যে, বাছখনৰ চালকসহ ৫ জন লোকৰ ঘটনাস্থলীতেই মৃত্যু হোৱাৰ বিপৰীতে আন এজন লোকৰ হাস্পতালত চিকিৎসাধীন অৱস্থাত মৃত্যু হয়। দুর্ঘটনাটোত আহতসকলক নিকটৱৰ্তী হাস্পতালত ভৰ্তি কৰোৱা হৈছে। নিহতসকলক বৰ্তমানলৈ চিনাক্ত কৰিব পৰা হোৱা নাই।