ৰয়েল ছেলেঞ্জাৰ্ছ বেংগালুৰুৱে যোৱানিশা কলকাতাৰ ইডেন গার্ডেনছত অনুষ্ঠিত আই পি এল ক্রিকেট প্রতিযোগিতাৰ অষ্টাদশ সংস্কৰণৰ প্ৰথমখন খেলত কলকাতা নাইট ৰাইডাৰ্ছক ৭ উইকেটত পৰাস্ত কৰে। খেলখনত কলকাতা দলে প্রথমে বেট ধৰাৰ আমন্ত্ৰণ লাভ কৰি নিৰ্ধাৰিত ২০ অভাৰত ৮টা উইকেটত হেৰুৱাই ১৭৪ ৰান সংগ্ৰহ কৰে। কলকাতা নাইট ৰাইডাৰ্ছৰ হৈ অধিনায়ক আজিংক্য ৰাহানেই ৫৬ আৰু অপেনৰ সুনীল নাৰায়ণে ৪৪ ৰানৰ বৰঙণি আগবঢ়ায়। ৰয়েল ছেলেঞ্জাৰ্ছ বেংগালুৰুৰ ক্রুনাল পাণ্ডিয়াই তিনিটা আৰু জোচ হেজেলউদে দুটা উইকেট
লাভ কৰে।
প্ৰত্যুত্তৰত ৰয়েল ছেলেঞ্জাৰ্ছ বেংগালুৰুৱে বিৰাট কোহলি আৰু ফিলিপ চল্টে অপেনিং যুটীত সংগ্ৰহ কৰা ৯৫ ৰানৰ সহায়ত ১৭ অভাৰত অনায়াসে লক্ষ্য অতিক্ৰম কৰে। ফিলিপ চল্টে ৫৬ ৰানৰ বৰঙণি আগবঢ়ায়। কোহলিয়ে ৫৯ ৰান কৰি আউট নোহোৱাকৈ থাকে। প্রতিযোগিতাত আজি দুখন খেল খেলোৱা হ’ব। ইয়াৰে বিয়লি চাৰে ৩ বজাত হায়দাবাদত হ’বলগীয়া প্ৰথমখন খেলত ৰাজস্থান ৰয়েলছ ছানৰাইজাৰ্ছ হায়দাবাদৰ বিৰুদ্ধে অৱতীৰ্ণ হ’ব। সন্ধিয়া চাৰে ৭ বজাত চেন্নাইত হ’বলগীয়া দ্বিতীয়খন খেলত মুম্বাই ইণ্ডিয়ানছ, চেন্নাই চুপাৰ কিংছৰ সন্মুখীন হ’ব।