ডাউনলোড
মোবাইল এপ

android apple
signal

March 31, 2025 11:42 AM | IPL Cricket

printer

আই পি এলত চেন্নাই চুপাৰ কিংছ, ৰাজস্থান ৰয়েলছৰ হাতত পৰাস্ত

আই পি এল ক্রিকেট প্রতিযোগিতাৰ এখন খেলত কালি নিশা গুৱাহাটীৰ বর্ষাপাৰা ষ্টেডিয়ামত ৰাজস্থান ৰয়েলছে চেন্নাই চুপাৰ কিংছক ৬ ৰাণৰ ব্যৱধানত পৰাস্ত কৰে। খেলখনত চেন্নাই চুপাৰ কিংছে নিৰ্ধাৰিত ২০ অভাৰত ৬ উইকেটৰ বিনিময়ত ১৭৬ ৰাণ সংগ্ৰহ কৰিবলৈ সমৰ্থ হয়। দলটোৰ হৈ অধিনায়ক ৰুতুৰাজ গাইকোৱাডে সৰ্বাধিক ৬৩ ৰাণ কৰে। ৰাজস্থান ৰয়েলছৰ হৈ ৱানিন্দু হাছাৰংগাই চাৰিটা উইকেট লোৱাৰ লগতে জোফ্ৰা আৰ্চাৰ আৰু সন্দীপ শর্মাই এটাকৈ উইকেট দখল কৰে। ইয়াৰ পূর্বে টচত জিকি চেন্নাই চুপাৰ কিংছে ফিল্ডিং কৰাৰ সিদ্ধান্ত লৈছিল। প্রথমে বেট ধৰি ৰাজস্থান ৰয়েলছে নিৰ্ধাৰিত ২০ অভাৰত ৯টা উইকেট বিনিময়ত ১৮২ ৰাণ সংগ্ৰহ কৰে। ৰাজস্থান ৰয়েলচৰ হৈ ১০টা চাৰি আৰু ৫টা ছয় কোবাই ৩৬টা বলত ৮১ ৰাণ কৰা নীতিশ ৰাণাক প্লেয়াৰ অফ দ্যা মেচ সন্মান প্ৰদান কৰা হয়। চেন্নাই চুপাৰ কিংছৰ হৈ খলীল আহমেদ, নুৰ আহমদ আৰু মাথীছা পাথীৰাণাই দুটাকৈ উইকেট দখল কৰে। ৰবিচন্দ্রন অশ্বিন আৰু ৰবীন্দ্ৰ জাডেজাই এটাকৈ উইকেট দখল কৰে। আই পি এল ক্রিকেট প্রতিযোগিতাৰ আন এখন খেলত কালি দেলহী কেপিটেলছে চানৰাইজাৰ্চ হায়দৰাবাদক সাত উইকেট বিনিময়ত পৰাস্ত কৰে। প্ৰথমে বেট ধৰি চানৰাইজাৰ্চ হায়দাবাদে ১৮ অভাৰ আৰু চাৰিটা বলত ১৬৩ ৰাণ সংগ্ৰহ কৰি ১৬৪ ৰাণৰ লক্ষ্য নিৰ্ধাৰণ কৰি দিছিল। ইয়াৰ প্রত্যুত্তৰত দেলহী কেপিটেলছে ৩টা উইকেট হেৰুৱাই ১৬ অভাৰত ১৬৬ ৰাণ সংগ্ৰহ কৰি বিজয় লক্ষ্য অতিক্ৰম কৰে। আজি মুম্বাইৰ ৱাংখাডে ষ্টেডিয়ামত মুম্বাই ইণ্ডিয়ানছ কলকাতা নাইট ৰাইডাৰ্ছৰ মুখামুখি হব। খেলখন সন্ধিয়া চাৰে সাত বজাত আৰম্ভ হ’ব|

অধিক পঢ়ক

সকলো চাওক