ভাৰতীয় ক্রিকেট দলে আমেৰিকা আৰু ৱেষ্ট ইণ্ডিজত চলি থকা আই চি চি টি-২০ বিশ্বকাপ ক্রিকেট প্রতিযোগিতা গ্রুপ পর্যায়ত অপৰাজেয় হৈ থকাৰ লগতে ৭ পইণ্ট লাভ কৰি শীৰ্ষস্থানত উপনীত হৈ ছুপাৰ -৮ লৈ যোগ্যতা অৰ্জন কৰিছে। যোৱা নিশা ভাৰতে নিজৰ চতুৰ্থ তথা অন্তিম লীগ খেলখনত কানাডাৰ বিৰুদ্ধে অৱতীৰ্ণ হয় যদিও বৰষুণৰ বাবে খেলখন পৰিত্যক্ত হয়। ফলত উভয় দলে ১ পইণ্টকৈ লাভ কৰে। ভাৰতে ইয়াৰ পূৰ্বে আয়াৰলেণ্ড, পাকিস্তান আৰু আমেৰিকাক পৰাস্ত কৰিছিল। উল্লেখযোগ্য যে ছুপাৰ-৮ত ভাৰতে তিনিখন খেল খেলিব। অহা ২০ জুনত আফগানিস্তান আৰু ২৪ জুনত অষ্ট্ৰেলিয়াৰ বিৰুদ্ধে খেলাৰ বিপৰীতে ২২ জুনত দ্বিতীয় খেলখন খেলিব যদিও ভাৰতৰ প্ৰতিদ্বন্দ্বী এতিয়াও নিশ্চিত হোৱা নাই।