আয়ুৰ্বেদিক চিকিৎসা সংস্থাৰ উদ্যোগত আৰু বিশ্ব আয়ুৰ্বেদ পৰিষদ, অসম শাখা আৰু চৰকাৰী আয়ুৰ্বেদিক মহাবিদ্যালয়, গুৱাহাটীৰ সহযোগত অহা ৯ আৰু ১০ নৱেম্বৰত জালুকবাৰীৰ চৰকাৰী আয়ুৰ্বেদিক মহাবিদ্যালয়ত এখন ৰাষ্ট্ৰীয় পৰ্যায়ৰ আলোচনাচক্র অনুষ্ঠিত হ’ব। আজি গুৱাহাটী প্ৰেছক্লাবত আয়োজিত এখন সংবাদমেলত আয়োজক সমিতিয়ে জনোৱা অনুসৰি আয়ুৰ্বেদৰ শেহতীয়া অগ্ৰগতি শীৰ্ষক বিষয়বস্তুৰে হ’বলগীয়া আলোচনাচক্ৰখনত আন্তঃৰাষ্ট্ৰীয় পৰ্যায়ত খ্যাতিসম্পন্ন কেইবাগৰাকীও আয়ুৰ্বেদিক চিকিৎসক আৰু বিজ্ঞানীয়ে অংশগ্ৰহণ কৰিব। দেশৰ ১৯ খন ৰাজ্যৰ প্ৰায় চাৰি শতাধিক অংশগ্ৰহণকাৰীয়ে কৰ্মশালাত যোগদান কৰিবলৈ নাম পঞ্জীয়ন কৰা বুলি আয়োজক সমিতিয়ে প্ৰকাশ কৰে। আলোচনাচক্ৰখন সাফল্যমণ্ডিত কৰিবলৈ ইতিমধ্যে মুখ্যমন্ত্রী হিমন্ত বিশ্ব শৰ্মাক মুখ্য পৃষ্ঠপোষক হিচাপে লৈ এখন উচ্চ পৰ্যায়ৰ সমিতি গঠন কৰা বুলিও তেওঁলোকে জানিবলৈ দিয়ে।