অসম গণ পৰিষদৰ আমবাৰীৰ মুখ্য কাৰ্যালয়ত আজি অসম মহিলা পৰিষদ, অসম কৃষক পৰিষদ, অসম ছাত্ৰ পৰিষদ আৰু অসম ধৰ্মীয় সংখ্যালঘু পৰিষদৰ ৪ খন গুৰুত্বপূৰ্ণ বর্ধিত কেন্দ্ৰীয় কাৰ্যনিৰ্বাহকৰ সভা অনুষ্ঠিত হয়। চাৰিখন সভাতে কেন্দ্রীয় সমিতি, জিলা সমিতি আৰু সমষ্টি সমিতিৰ সভাপতি, সম্পাদক তথা বিষয়ববীয়াসকলে অংশগ্ৰহণ কৰে। মূলতঃ তৃণমূল পৰ্যায়ৰ পৰা দলটোক সাংগঠনিকভাৱে শক্তিশালী কৰা আৰু নিৰ্বাচনকেন্দ্ৰিক প্ৰস্তুতিৰ বিষয়ে আলোচনা কৰাৰ উদ্দেশ্যে এই সভাকেইখন অনুষ্ঠিত কৰা হয়। সেই অনুসৰি অহা ১১, ১২ আৰু ১৩ আগষ্ট তাৰিখে সকলো বিধানসভা সমষ্টিতে সভা অনুষ্ঠিত কৰাৰ লগতে ১৯, ২০ আৰু ২১ আগষ্ট তাৰিখে গুৱাহাটীত তিনিদিনীয়াকৈ ৰাজনৈতিক কৰ্মশালা আৰু ২৫ আগষ্টৰ পৰা ৩১ আগষ্টলৈ প্ৰতিটো বুথটে বুথ সন্মিলন অনুষ্ঠিত কৰা হ’ব বুলি দলৰ সভাপতি অতুল বৰাই জানিবলৈ দিয়ে। আঞ্চলিকতাবাদৰ সুদিন ঘূৰি আহিছে উল্লেখ কৰি শ্ৰীবৰাই কয় যে, শক্তিশালী আঞ্চলিকতাবাদে অসমক আগুৱাই নিব। অসম গণ পৰিষদ দলে আহিবলগীয়া দিনত অসমৰ ৰাজনীতিত উল্লেখনীয় ভূমিকা গ্ৰহণ কৰিব বুলি দলটোৰ কাৰ্যকৰী সভাপতি তথা মন্ত্ৰী কেশৱ মহন্তই মন্তব্য কৰে। সভাত দলৰ সাধাৰণ সম্পাদককে ধৰি কেইবাগৰাকীও নেতা-কর্মী উপস্থিত থাকে।