দিল্লীৰ মুস্তাফাবাদ এলেকাত কালি পুৱতি নিশা এটা চাৰি মহলীয়া ভৱন খহি পৰাৰ ফলত ১১ জন লোকে প্ৰাণ হেৰুৱায়। ধ্বংসস্তূপৰ মাজৰ পৰা উদ্ধাৰ কৰা ৫ জন লোকক চিকিৎসালয়ত ভৰ্তি কৰোৱা হৈছে আৰু আন ৬ জনক চিকিৎসাৰ অন্তত ঘৰলৈ যাব দিয়া হৈছে। ৰাষ্ট্ৰীয় দুৰ্যোগ সঁহাৰি বাহিনীৰ লগতে আৰক্ষী, অগ্নি নির্বাপণ বাহিনী, দিল্লী দুর্যোগ ব্যৱস্থাপনা প্ৰাধিকৰণ আৰু অন্যান্য সংস্থাই উদ্ধাৰ অভিযান অব্যাহত ৰাখিছে। দিল্লীৰ মুখ্যমন্ত্ৰী ৰেখা গুপ্তাই এই ঘটনাত গভীৰ শোক প্ৰকাশ কৰাৰ লগতে সমগ্ৰ ঘটনাটোৰ তদন্তৰ নিৰ্দেশ দিছে। আহতসকলক উপযুক্ত চিকিৎসাৰ ব্যৱস্থা কৰা হৈছে বুলিও মুখ্যমন্ত্ৰীয়ে প্ৰকাশ কৰে। ৰাষ্ট্ৰীপতি শ্ৰীমতী দ্রৌপদী মুৰ্মু আৰু প্ৰধানমন্ত্ৰী নৰেন্দ্ৰ মোদীয়ে এই ঘটনাক লৈ গভীৰ শোক প্ৰকাশ কৰাৰ লগতে আহতসকলৰ আশু-আৰোগ্য কামনা কৰিছে। ৰাষ্ট্ৰপতিগৰাকীয়ে এটা বাৰ্তাত কয়, যে এনেদৰে ভৱন খহি মহিলা আৰু শিশুসহ ভালেমান লোকৰ প্ৰাণহানি হোৱাৰ ঘটনা অত্যন্ত দুৰ্ভাগ্যজনক। প্রধানমন্ত্ৰী নৰেন্দ্ৰ মোদীয়ে নিহতসকলৰ নিকটাত্মীয়লৈ দুই লাখ আৰু আহত সকলক ৫০ হাজাৰ টকাকৈ এককালীন সাহায্য আগবঢ়োৱাৰ কথা ঘোষণা কৰিছে।