আন্তঃৰাষ্ট্ৰীয় বিনিয়োগ আকৰ্ষিত কৰাৰ বাবে কেৰালাই চলাই থকা গুৰুত্বপূৰ্ণ অভিযানে এটা বিশেষ গতি লাভ কৰিছে। ৰাজ্যখনৰ উদ্যোগ মন্ত্ৰী পি ৰাজীৱৰ নেতৃত্বত ডুবাইলৈ যোৱা এটা উচ্চ পৰ্যায়ৰ প্ৰতিনিধি দলে সমাগত ইনভেষ্ট কেৰালা গ্লোবেল ছামিট আই কে জি এছ-ৰ বাবে সংযুক্ত আৰৱ আমিৰি ৰাষ্ট্ৰৰ শীর্ষস্থানীয় বাণিজ্য আৰু চৰকাৰী নেতৃবৃন্দৰ পৰা প্ৰতিশ্ৰুতি লাভ কৰিছে। যোৱা ১৩ আৰু ১৪ তাৰিখে ধাৰাবাহিকভাৱে চলা কৌশলগত আলোচনাৰ জৰিয়তে মন্ত্ৰী পি ৰাজীৱে সংযুক্ত আৰৱ আমিৰি ৰাষ্ট্ৰৰ বিনিয়োগ মন্ত্রী মহম্মদ হাছান আল ছুবেদি আৰু আবু ধাবি বাণিজ্য মহাসংঘৰ অধ্যক্ষ জাছিম অল জাবিৰ তথা ৰাষ্ট্ৰখনৰ অন্যান্য মুখ্য বিষয়াসকলৰ সৈতে আলোচনাত মিলিত হয়। এই আলোচনাকালত UAE-য়ে অহা ২১ আৰু ২২ ফেব্ৰুৱাৰীত আয়োজিত আই কে জি এছ-ত অংশগ্ৰহণৰ বাবে এটা বিশেষ প্রতিনিধি মণ্ডল কেৰালালৈ পঠিয়াব বুলি উল্লেখ কৰে। মন্ত্ৰী ছুবেদিয়ে কেৰালাৰ খাদ্য সংসাধন আৰু লজিষ্টিকছ খণ্ডত বিনিয়োগৰ বাবে বিশেষ আগ্ৰহ প্ৰকাশ কৰে ।