राजस्थान रा केई हलकां मांय बिरखा रा समाचार- काश्तकारां रा चेहरा मुळक्या।

Jan 05, 2022

3:49PM

राजस्थान रा केई हलकां मांय बिरखा रा समाचार- काश्तकारां रा चेहरा मुळक्या।

AIR Jaipur

राज्य मांय आज एक पश्चिमी विक्षोभ सक्रिय व्हेवण ऊं केई हलकां मांय बिरखा व्हे रही है तो कुछ हलकां मांय बादळा मंड्योड़ा है। लारला चौबीस घंटा मांय राज्य रा आतूणी हलकां मांय घणखर ठौड़ां बिरखा व्ही। सब ऊं बत्ती 12 दशमलव 4 मिलीमीटर बिरखा जैसलमेर मांय दर्ज करी ज्यी। राजधानी जयपुर समेत राज्य रा ऊगणी हलकां मांय ई कठै-कठै हल्की बिरखा रा समाचार है। सीकर मांय आज संवारे मोड़ा तांई कोहरो रेहवण ऊं आवण-जावण माथे असर पड़्यो। वठै छांटा-छिड़का अर तेज बायरा रे कारण ठंड रो असर बध ग्यो है। झुंझुनू ज़िला मांय ई संवारे ऊं ई बिरखा व्हेवण रा समाचार है। ईं बिरखा ऊं काश्तकारां रा चेहरा मुळक ग्या है। श्रीगंगानगर मांय कोई पौन घंटा तांई ज़ोरदार मेह व्ह्यो। अलवर ज़िला मांय ई बिरखा व्हेवण ऊं पारो उतर्यो है। बूंदी मांय छांटो-छिड़को व्हेवण अर बारां मांय बादळा मंड्या रेहवण रा समाचार है। टोंक मांय संवारे ऊं ई सूरज नी निकळ्यो अर छांटो-छिड़को व्ह्यो। वठे सिंज्यां री पौर तेज़ बिरखा व्हेवण रा समाचार है। बीकानेर ज़िला रा नोखा मांय ई बिरखा व्हेवण अर धुंध रा समाचार है। धुंध रे कारण ज़िला रा चरकड़ा गांव कने नागौर ऊं नोखा ओड़ी जा रही लोक परिवहन सेवा री बस अर कैंपर बीचे टक्कर व्हे ग्यी। हादसा रे कारण कैंपर मांय सवार कुछ मजूर ज़ख्मी व्हे ग्या, ज्यां ने अस्पताल मांय भेजी ज्या है। मेह रो दौर आवता चार-पांच दिन तांई चालण रा आसार है। 7 जनवरी ऊं राज्य मांय एक और पश्चिमी विक्षोभ रा असर ऊं बिरखा मांय बधोतरी व्हेवण री संभावना है।