चंद्रपूरच्या वन प्रबोधनीने बोलणारं झाड हा अभिनव उपक्रम राबवला आहे. वनमंत्री सुधीर मुनगंटीवार यांच्या हस्ते वन प्रबोधनीच्या परिसरात नुकतंच या उपक्रमाचं उद्घाटन करण्यात आलं. 

झाडाची संपूर्ण माहिती, त्याचे उपयोग आदी बाबी जाणून घेण्यासाठी चंद्रपूरच्या वन प्रबोधनीने ‘टॉकिंग ट्री’ म्हणजेच बोलणारं झाड हा उपक्रम राबवून झाडावर त्यासंदर्भातला ‘क्यूआर कोड’ विकसित केला आहे. या क्यूआर कोडच्या माध्यमातून आता झाड स्वतःच स्वत:बद्दलची माहिती देणार आहे.

यामुळे विविध प्रजातींची झाडं आता  मोबाईलद्वारे ओळखता येतील. प्रत्येक प्रजातीची सविस्तर माहिती दृकश्राव्य माध्यमातून उपलब्ध होणार आहे. वन प्रबोधनी परिसरातील प्रत्येक झाडावर पाटी स्वरुपात क्यूआर कोड लावला जाणार आहे.

‘टॉकिंग ट्री’ या मोबाईल ॲपद्वारे क्यूआर कोड स्कॅन केल्यानंतर संबंधित झाड स्वत:बद्दल विविध भाषांमध्ये माहिती देणार आहे. प्रबोधनीच्या परिसरात विविध प्रजातींची झाडं आणि परिसरातील जैव विविधतेबद्दल अधिकाधिक माहिती जाणून घेणं यामुळे आता शक्य होणार आहे.