मुंबईसह राज्याच्या  काही भागात गोवर आजाराच्या साथीचा वाढता प्रादुर्भाव पाहता लसीकरण न झालेल्या बालकांच्या लसीकरणाची मोहीम अधिक तीव्र करण्याचा निर्णय राज्य सरकारनं घेतला आहे. ज्या बालकांचं गोवर प्रतिबंधक लसीकरण झालेलं नाही त्यांना लगेच संक्रमण होण्याचा धोका वाढतो, असं राज्याचे दक्षता अधिकारी डॉ. प्रदीप आवटे यांनी सांगितलं.

गोवर आजाराचा प्रादुर्भाव हा कोविड - १९ पेक्षा अधिक वेगानं होतो आहे. गोवर आजाराने संक्रमित झालेल्या एका व्यक्तीमुळे  १२ ते १५ जणांना संसर्ग होण्याची शक्यता असते, लसीकरण झालेल्या बालकांना गोवराचा संसर्ग झाला तरी त्याची तीव्रता कमी असते, असं त्यांनी सांगितलं. 

दरम्यान, मुंबईत काल गोवरचे  आठ नवीन रुग्ण  आढळून आले.  त्यामुळे मुंबईतल्या  एकूण गोवर रुग्णांची संख्या २६० वर पोहोचली आहे. केवळ मुंबईत गोवरामुळे सुमारे १३ बालकांचा मृत्यू झाल्याची माहिती आरोग्य विभागानं  दिली आहे. मुंबईत कुर्ला आणि गोवंडी, ठाणे जिल्ह्यात भिवंडी आणि नाशिक जिल्ह्यात मालेगाव मध्ये गोवरचा प्रादुर्भाव वाढल्याची नोंद आहे.