পঞ্চম খেল' ইণ্ডিয়া যুৱ ক্ৰীড়া সমাৰোহ আজি সন্ধিয়া মধ্য প্ৰদেশত আৰম্ভ হ'ব। কেন্দ্ৰীয় ক্রীড়া আৰু যুৱ কল্যাণ মন্ত্ৰী অনুৰাগ সিং ঠাকুৰ আৰু মধ্যপ্ৰদেশৰ মুখ্যমন্ত্ৰী শিৱৰাজ সিং চৌহানে আজি সন্ধিয়া ৭ বজাত ভূপালৰ টিটি নগৰ ষ্টেডিয়ামত এই বিশাল ক্রীড়া মহোৎসৱৰ শুভাৰম্ভ কৰে। কেন্দ্ৰীয় ক্রীড়া ৰাজ্যমন্ত্ৰী নীতিশ প্রামাণিক আৰু অন্যান্য অভ্যাগতসকলেও এই কাৰ্যসূচীত অংশগ্ৰহণ কৰে। মধ্যপ্ৰদেশত প্ৰথমবাৰৰ বাবে আয়োজিত খেল’ ইণ্ডিয়া যুৱ ক্ৰীড়াত দেশৰ বিভিন্ন প্ৰান্তৰ প্ৰায় ছহেজাৰ খেলুৱৈয়ে অংশগ্ৰহণ কৰিব। সমাৰোহত খেলুৱৈসকলে ২৭টা ক্রীড়া শিতানত আঢ়ৈশৰো অধিক সোণৰ পদকৰ বাবে নিজৰ সৰ্বোচ্চ উজাৰি দিব। ১৩ দিনীয়া খেলো ইণ্ডিয়া ক্রীড়া মহোৎসৱৰ বাবে প্ৰায় ১৩ হাজাৰ বিষয়া আৰু দুহেজাৰ স্বেচ্ছাসেৱক নিয়োগ কৰা হৈছে। অহা ১১ ফেব্ৰুৱাৰীলৈ মধ্যপ্ৰদেশৰ ভূপাল, ইন্দোৰ, উজ্জয়নী, জববলপুৰ, গোৱালিয়ৰ, মান্দলা, বালাঘাট আৰু মহেশ্বৰ নগৰত এই ক্রীড়া মহোৎসৱৰ বিভিন্ন প্রতিযোগিতা অনুষ্ঠিত হ'ব। উল্লেখযোগ্য যে, প্রধানমন্ত্ৰী নৰেন্দ্ৰ মোদীৰ পৰামৰ্শ অনুসৰি ২০১৮ চনত পোনপ্ৰথমবাৰৰ বাবে খেলো ইণ্ডিয়া যুৱ ক্ৰীড়া অনুষ্ঠিত হৈছিল। সেই সময়ত ইয়াৰ নাম আছিল খেলো ইণ্ডিয়া স্কুল গেমছ।