দ্বিতীয় খেল’ ইণ্ডিয়া বিশ্ববিদ্যালয় ক্ৰীড়া প্ৰতিযোগিতা চলিত বৰ্ষৰ শেষৰ ফালে কৰ্ণাটকত অনুষ্ঠিত হ’ব। কেন্দ্ৰীয় ক্ৰীড়া মন্ত্ৰী কিৰেণ ৰিজিজুৱে কালি বাংগালুৰুত সংবাদ মাধ্যমৰ আগত এই বিষয়ে ঘোষণা কৰি কয় যে, ভাৰতীয় বিশ্ববিদ্যালয় সংস্থাৰ সহযোগিতাত দেশৰ সৰ্ববৃহৎ এই বিশ্ববিদ্যালয় ক্ৰীড়া প্ৰতিযোগিতা অনুষ্ঠিত হ’ব। বাংগালুৰুত হ’বলগীয়া এই প্ৰতিযোগিতাত ২৫ বছৰ অনুৰ্ধৰ ৪ হাজাৰ খেলুৱৈয়ে অংশগ্ৰহণ কৰিব। উল্লখযোগ্য যে, এই প্ৰতিযোগিতাৰ পৰাই ৰাষ্ট্ৰীয় পৰ্যায়ৰ দলৰ অন্তৰ্ভুক্তিৰ বাবে খেলুৱৈ বাছনি কৰাৰো সম্ভাৱনা থাকে। যোৱা বছৰ ভূৱনেশ্বৰত প্ৰথমবাৰৰ বাবে খেল’ ইণ্ডিয়া বিশ্ববিদ্যালয় ক্ৰীড়া প্ৰতিয়োগিতা অনুষ্ঠিত হৈছিল। এইবাৰ মল্লখম্ব আৰু যোগাসনক নতুনকৈ এই প্ৰতিযোগিতাত অন্তৰ্ভুক্ত কৰা হৈছে। মুখ্যমন্ত্ৰী বি এছ য়েডিয়ুৰাপ্পাই এই প্ৰতিযোগিতাৰ বাবে যথা সম্ভৱ সহযোগিতা আগবঢ়াব বুলি নিশ্চিত প্ৰদান কৰিছে। ইপিনে, কেন্দ্ৰীয় ক্ৰীড়া তথা যুৱ কল্যাণ মন্ত্ৰী ৰিজুজুৱে আজি ফিট বেংগালুৰু চৌহদত ৪ টা নতুন ক্ৰীড়া সুবিধা উদ্বোধন কৰিব। ৰিজিজুৰ সৈতে এই অনুষ্ঠানত সাংসদ তেজস্বী চুৰ্য্যও উপস্থিত থাকিব।