আজি ৰাজ্যৰ বিভিন্ন প্ৰান্তত লাচিত বৰফুকনৰ ৪০০ বছৰীয়া জয়ন্তী বিভিন্ন কাৰ্যসূচীৰে পালন কৰা হয়। বিভিন্ন দল-সংগঠন, বিদ্যালয়-মহাবিদ্যালয়ে এই জয়ন্তী পালন কৰে। বাক্সা জিলাৰ বিভিন্ন শিক্ষানুষ্ঠানসমূহতো বীৰ লাচিত বৰফুকনৰ জয়ন্তী পালন কৰা হয়। এই উপলক্ষে বিদ্যালয়সমূহত বীৰগৰাকীৰ প্ৰতিকৃতিত মাল্যার্পণ, শ্রদ্ধাঞ্জলি আদি অনুষ্ঠানৰ আয়োজন কৰা হয়। কাৰ্বি আংলং জিলাৰ ডিফু চহৰৰ ধৰ্মনলাৰ চুকাফা ভৱন চৌহদত বীৰগৰাকীৰ প্ৰতিমূৰ্তি উন্মোচন কৰা হয়। কাৰ্বি আংলং টাই আহোম কালচালে ছ'চাইটি আৰু কাৰ্বি আংলং জিলা প্ৰশাসনৰ উদ্যোগত স্থাপন কৰা বীৰ লাচিত বৰফুকনৰ প্ৰতিমূৰ্তি জিলা উপায়ুক্তগৰাকীয়ে উদ্বোধন কৰে। ধুবুৰীৰ ৰজা প্ৰভাত চন্দ্ৰ বৰুৱা খেলপথাৰত লাচিত বৰফুকনৰ ৪০০ বছৰীয়া জয়ন্তী উদযাপনৰ মূল কাৰ্যসূচীৰ সৈতে সংগতি ৰাখি আহোম, মোগল, কোচ আৰু গুপ্ত সাম্রাজ্যত প্রচলিত বিৰল প্ৰাচীন মুদ্ৰাৰ প্ৰদৰ্শনীৰ আয়োজন কৰা হয়। একেদৰে জিলাখনৰ বিলাসীপাৰা মহকুমা প্রশাসন, পৌৰসভা আৰু জিলা ক্রীড়া সন্থাৰ উদ্যোগত লাচিত বৰফুকনৰ জয়ন্তী উপলক্ষে চহৰখনত পদযাত্রা উলিওৱা হয়। দক্ষিণ শালমাৰা মানকাচৰ জিলাৰ হাটশিঙিমাৰীত লাচিত দিৱসৰ কাৰ্যসূচীত জিলা আৰক্ষী প্ৰশাসনে চাৰি শতাধিক দৰিদ্ৰ লোকক কম্বল বিতৰণ কৰে। কামৰূপ জিলাৰ প্ৰশাসনৰ উদ্যোগত লাচিত দিৱস উপলক্ষে সাংস্কৃতিক শোভাযাত্রা উলিওৱা হয়। মৰিগাঁৱত প্ৰকৃতি প্ৰেমী মঞ্চ অসমে লাচিত বৰফুকনৰ ওপজা দিনত সমাজৰ বিভিন্ন দিশত ওৰেটো জীৱন সেৱা আগবঢ়াই অহা ৭ গৰাকী ব্যক্তিক বঁটা প্ৰদান কৰে। শোণিতপুৰ জিলাৰ তেজপুৰত অসম জাতীয়তাবাদী যুৱ ছাত্ৰ পৰিষদৰ উদ্যোগত পালিত লাচিত বৰফুকনৰ জয়ন্তীত বিধায়ক পৃথ্বী ৰাজ ৰাভা, জিলা উপায়ুক্ত দেৱকুমাৰ মিশ্ৰকে ধৰি বিভিন্ন ব্যক্তিয়ে অংশগ্ৰহণ কৰে। বৰপেটা জিলা প্ৰশাসনৰ উদ্যোগত মহাবীৰগৰাকীৰ কাপোৰত অঁকা এখন বিশাল চিত্র উন্মোচন তথা প্ৰদৰ্শন কৰা হয়। কেইবাগৰাকীও স্থানীয় চিত্র শিল্পীয়ে অংকন কৰা এই চিত্ৰখন চহৰৰ মাজেৰে বৈ যোৱা মৰা চাউলখোৱা নদীৰ দলঙৰ ওপৰত আঁৰি দিয়া হয়। শিৱসাগৰ জিলাৰ ৰংপুৰ প্ৰাচীন কৃতিচিহ্ন সংৰক্ষণ সমিতিৰ উদ্যোগত শিৱসাগৰ নগৰৰ লাচিত উদ্যানত দিনজোৰা বিস্তৃত কাৰ্যসূচীৰে লাচিত দিৱস উদযাপন কৰা হয়।