বিদেশ মন্ত্ৰী ড০ এছ জয়শংকৰে কালি ইজিপ্তত বাস কৰা ভাৰতীয় সম্প্ৰদায়ৰ লোকসকলক সাক্ষাৎ কৰি তেওঁলোকৰ সৈতে মত-বিনিময় কৰে। ড০ জয়শংকৰে লগতে ৰাষ্ট্ৰৰ স্বাৰ্থ আগুৱাই নিয়া আৰু অঞ্চলটোত ভাৰতৰ ভাৱমূৰ্তি গঢ়ি তোলাৰ বাবে তেওঁলোকক ধন্যবাদ জ্ঞাপন কৰে। মন্ত্ৰীগৰাকীয়ে তেওঁলোকক পৰম্পৰাগত শক্তিশালী সম্পৰ্কৰ অগ্ৰগতি আৰু বাণিজ্য আৰু বিনিয়োগ, যোগাযোগ, শিক্ষা, স্বাস্থ্য আৰু আন ভালেমান ক্ষেত্ৰত সৃষ্টি হোৱা নতুন সুযোগৰ বিষয়ে অৱগত কৰে। তেওঁ লগতে ভাৰতত চলি থকা আমোল পৰিৱৰ্তনৰ বিষয়েও উল্লেখ কৰে। ইয়াৰ পূৰ্বে ড০ জয়শংকৰে কাইৰোত ইজিপ্তৰ বিদেশ মন্ত্রী ছামেহ ছৌকিক সাক্ষাৎ কৰে। দুয়োগৰাকী নেতাই আঞ্চলিক ঘটনাক্ৰমক লৈ আলোচনা কৰে আৰু ইউক্রেইনৰ সংঘাত তথা ভাৰত প্ৰশান্ত মহাসাগৰীয় বিষয় সন্দৰ্ভত মত বিনিময় কৰে। ড০ জয়শংকৰ সম্প্ৰতি শ্ৰীছৌকিৰ আমন্ত্ৰণ মৰ্মে দুদিনীয়া ভ্রমণসূচীৰে ইজিপ্তত আছে।